Rrahje mes dy familjeve në Barilevë për shkak të borxhit, arrestohen pesë
Galeria e Podujevës hapet me “Dëshmitarët” për të mbijetuarit e masakrave
Hoteli i dikurshëm “Llapi” prej së premtes mbrëma ka hapur dyert si galeri arti. Ndonëse ende nuk e ka marrë këtë status zyrtarisht, aty do të jetë pikëtakimi i artistëve dhe i shpalosjes së artit. “Dëshmitarët” e Valdrin Fetahut është e para ekspozitë. Nëpërmjet portreteve të të mbijetuarve të masakrave, ai dokumenton të shkuarën, i thërret kujtesës. Ka një histori përmbajtjesore edhe pikënisja e ekspozitës
Gjashtëmbëdhjetë fotografi të të mbijetuarve të luftës me nga një rrëfim të shkurtër kanë zënë vend në muret e Galerisë së qytetit të Podujevës, që është përuruar mbrëmjen e së premtes. Në këtë ceremoni hapëse, kryetari i Komunës së Podujevës, Shpejtim Bulliqi, ka thënë se me këtë projekt të realizuar, e që janë hapësirat e ish-hotel “Llapit”, po u bëhet një vend artistëve.
“Kjo shtëpi e artistëve që sot po e bëjmë përurimin e saj do të jetë një vend ku do t’i takojë artdashësit, do t’i takojë njerëzit e kulturës, njerëzit që merren me këto veprimtari dhe sado pak do t’ua zgjidhë problemet. Kjo iu ka munguar si hapësirë pune dhe si hapësirë e aktiviteteve të tyre me të cilën këta merren. Besoj shumë se kjo shtëpi, ky vend, po e quaj shtëpi sepse po t’i themi galeri, galeria i ka disa procedura të tjera, të cilat i kërkon dhe besoj shpejt do ta marrë këtë titull. Po sigurisht që nevojitet edhe disa procedurave të cilat duhet kaluar që të krijojmë në kuptimin e plotë si galeri të qytetit”, është shprehur Shpejtim Bulliqi. “Sidoqoftë nga sonte e tutje artdashësit e kanë një vend të tyre, e kanë një hapësirë të tyre, ku do të kenë mundësi edhe të ekspozojnë të arriturat e tyre në këtë fushë”.
Drejtori për Kulturë, Rini dhe Sport, Pajtim Balaj, ka thënë se kur objektet publike (në vitet ’90) ishin të mbyllura për shqiptarët, ky objekt, që në atë kohë ishte privat, ka qenë hapësira e vetme në të cilën të gjithë të rinjtë llapjanë, krijuesit llapjanë e kanë pasur këtë mundësinë që të zhvillojnë dhe të mbajnë gjallë jetën artistike dhe kulturore të komunitet shqiptarë këtu.
“Kjo shtëpi e artistëve, që sot po e bëjmë përurimin e saj, do të jetë një vend ku do t’i takojë artdashësit, do t’i takojë njerëzit e kulturës, njerëzit që merren me këto veprimtari dhe sado pak do t’ua zgjidhë problemet”, ka thënë kryetari i Komunës së Podujevës, Shpejtim Bulliqi
“Prandaj jam i lumtur që një vend si ky, një hapësirë si kjo, me shumë histori po vazhdon të mbetet hapësira e ushtrimit të veprimtarisë artistike”, ka thënë ai.
Ceremonia hapëse është përcjellë me ekspozitën e parë të Valdrin Fetahut, e titulluar “Dëshmitarët”, e ku janë vendosur fotografi prej disa të të mbijetuarve të luftës, por që kishin qenë prezentë gjatë vrasjes së familjarëve të tyre.
Ali Podvorica është njëri prej tyre, të cilit forcat serbe ia kishin vrarë djalin në masakrën e Dyzit në Podujevë. Ai ka thënë se kjo ekspozitë tregon respektin dhe nderimin për të vrarët që dhanë jetën në luftë.
“Nuk vdiqën me pushkë në dorë, por i rezistuan dhe nuk iu përkulën armikut, e kundërshtuan në çdo mënyrë, burra, gra, të rinj, të reja, madje edhe fëmijë. Edhe pse ata të paarmatosur, ai nuk i kurseu për të vrarë pa dalim moshe e gjinie. Nuk kishte me qenë shpenzim i madh që në objektin e administratës komunale për punëtorët e saj të vrarë, në objekte shkollore për mësimdhënësit e nxënësit e vrarë të atyre shkollave të shkruhet nga një biografi e shkurtër me një fotografi dhe të futet në korniza dhe të vendosen në korridoret e atyre objekteve”, është shprehur Ali Podvorica.
Sipas tij, kjo do të mbetej si dëshmi edhe për mysafirët e jashtëm që i vizitojnë këto objekte, por “edhe më e rëndësishme mbetet inspirim dhe shtim dashurie për gjeneratat e reja për atdhe. Për një popull që e harron të kaluarën nuk ka ardhmëri”.
Ndërkohë, autori e kësaj ekspozite, Valdrin Fetahu, ka thënë se ideja e këtij projekti ka nisur prej një lajmi: Vdekja e dëshmitarëve po i lë pa hetuar masakrat në Kosovë.
Gjatë atij lajmi e kam lexuar që një plak i një fshati të Drenicës ka vdekur pa i dëshmuar askund rrëfimet e tij dhe kam dashtë që me ia nisë me komunën time, që dëshmitarët që i kemi, me i pasë rrëfimet dhe me e pasë së paku një fotografi të tyre që mos me vdekë edhe historia, por edhe ata pa rrëfimet e tyre. Kështu që i falënderoj familjarët që më kanë ndihmuar dhe kanë pranu me qenë pjesë e këtij projekti”, ka theksuar Fetahu. “Neve në Podujevë nëse na kanë pyet për masakrat, menjëherë na ka shkuar mendja te familja Bogujevci, te Saranda. Qëllimi i këtij projekti është që pasi të dalim nga galeria kur të përmenden masakrat, përveç familjes Bogujevci, me na ra në mend edhe historia e Aliut, me na ra në mend edhe historia e Sevdaimit, e tetës Bastrie, që nuk i ka gjetë eshtrat e burrit të saj për 10 vjet, e Tefikut, i cili e ka pa babën dhe vëllain me sy, duke ia mbytë edhe plot histori të tjera të cilat nuk i kemi dëgjuar”. /KOHA net/N.Toverlani/