Fillon ndërtimi i objekteve për banim të përballueshëm dhe social në Podujevë

Dy objekte me 133 njësi banimi do të ndërtohen në Komunën e Podujevës nga projekti i banimit të përballueshëm dhe ai social.

Ceremonia e vënies së gurthemelit është mbajtur të martën, në të cilën ka marrë pjesë Kryeministri në detyrë, z.Albin Kurti, Kryetari i Komunës së Podujevës, z.Shpejtim Bulliqi, Zëvendësministri i Mjedisit, Planifikimit Hapësinor dhe Infrastrukturës, z.Jeton Raka, deputetë të Kuvendit të Kosovës, zyrtarët tjerë nga niveli qendror e lokal e qytetarë.

Kryeministri Kurti tha se banimi është një e drejtë themelore njerëzore, prandaj po punojnë anë e mbanë Kosovës në mënyrë që qytetarët të kenë banesa me kushte të mira për familjet e tyre.

“Çiftet e reja dhe familjet të cilat përbëhen nga prindi vetushqyes janë ato të cilat marrin këtë lajm të gëzueshëm sot në Llap. Dhe këtu bëhet fjalë për ata të cilët nuk e kanë zgjidhur çështjen e banimit dhe gjithashtu ata të cilat në çift së paku njëri prej partnerëve është nën moshën 37 vjeçare”, theksoi Kurti.

Ai deklaroi se në vitin 2021 e kanë miratuar agjendën qeveritare për banim të përballueshëm dhe social, e cila synon sigurimin e qasjes në banim të denjë, të përballueshëm dhe gjithspërfshirë për të gjithë qytetarët.

Ndërkohë, Kryetari Bulliqi tha se me ndërtimin e këtyre banesave çiftet e reja dhe rastet sociale do ta kenë një mundësi më të madhe për ta zgjidhur çështjen e banimit.

“Sigurisht që jemi shumë të kënaqur, spese është njëri prej projekteve kapitale më të mëdha që po realizohen në Komunën tonë. E tha edhe Kryeministri se mbi 13 milionë e 500 mijë euro është vlera e projektit në përgjithësi në një sipërfaqe mbi 20 mijë metra katror. E shfrytëzoj rastin që ta falënderoj Kryeministrin Kurti dhe Zëvendësministrin Raka për krejt ndihmën që po na e japin për Komunën tonë për realizimin e një varg projektesh në interes të qytetarëve”, theksoi Bulliqi. 

Ndërsa, Zëvendësministri Jeton Raka tha se kjo është komuna e tretë ku po e fillojnë realizimin e projektit të banimit të përballueshëm dhe social. Në të njëjtën kohë ai deklaroi se nga 38 komuna vetëm 13 kanë aplikuar për këtë projekt që ndihmon në zgjidhjen e çështjes së banimit për çiftet e reja dhe rastet sociale.

Projekti që filloi sot në Podujevë përfshin ndërtimin e 2 objekteve banesore me 133 njësi banimi, ku 106 banesa janë të dedikuara për çiftet e reja, kurse 27 të tjera për raste sociale.

Banesat do të kenë sipërfaqe të ndryshme dhe nisin nga 53m², 66m², 77m² dhe 87m².

Vlera e përgjithshme e investimit është 13,597,766.62 euro.