‘Falja e hidrocentraleve’: Aktakuzë ndaj Mimoza Kusarit, Besim Beqajt, Dardan Gashit, Nenad Rashiqit e disa të tjerëve
Prokuroria Speciale e Kosovës ka ngritur aktakuzë kundër 19 personave, përfshirë zyrtarë e ish-zyrtarë të lartë politikë për veprën penale “keqpërdorimi i pozitës apo autoritetit zyrtar”.
Në mesin e të akuzuarve, siç mëson KOHA, janë deputetja Mimoza Kusari-Lila, ish-ministrat Besim Beqaj, Dardan Gashi e Nenad Rashiq. Ata akuzohen për rastin e njohur si “falja e hidrocentraleve”.
Këta zyrtarë janë vetëm disa nga 19 të akuzuarit për këtë vepër penale. Të akuzuarit janë: B.B., F.H., M.K., D.G., N.R., A.Gj., F.Ç., M.R., A.N., F.K., I.I., G.J., B.B., G.Sh., N.H., A.A., B.H., K.B., dhe L.F..
Ish-ministri i Zhvillimit Ekonomik, Besim Beqaj, ishte kryesues i Komitetit Qeveritar për Privatizim më 2013. Ai akuzohet se bashkë me anëtarët, po ashtu ish-ministria, Mimoza Kusari-Lila, Nenad Rashiqin, Dardan Gashi e L.F. më 8 maj 2013 kishin votuar që hidrocentralet të cilat prodhojnë energji elektrike si: hidrocentrali i Lumbardhit, ai në Burim, i Radavcit dhe hidrocentrali “Dikance”, të transferohen tek Kompania Kosovare për Distribuim dhe Furnizim me Energji Elektrike dhe më pas të privatizohen nga “Limak-Calik”.
Sipas njoftimit, në të njëjtën ditë ata kishin nënshkruar marrëveshje për importe, për transferim, për furnizim, për implementim, për borxhe duke përmbyllur procesin e privatizimit të KKDFE-së, “përkundër se të njëjtat nuk është dashur të tranferohen dhe privatizohen, për arsye se një veprim të tillë e ndalon baza ligjore, Ligji për rregullatorin e energjisë elektrike nr.05/L-084, neni 35, paragrafi 4, të njëjtat asete kanë qenë nën koncesion si dhe rekomandimi i IFC ka qenë që të njëjtat të mbesin në kuadër të KEK, e me këto veprime, të njëjtit, kanë dëmtuar interesat e kompanisë KEK si dhe akionarit Qeveria e Republikës së Kosovës, konkretisht vetëm për qera mujore për periudhat e mbetura të koncesionimit në shumën prej 1,054,000.00 euro, sepse e njëjta duhet të i paguhet KEK-ut e jo kompanisë privatizuese, si dhe pas përfundimit të koncesionimit, të njëjtat ngelin në pronësi të kompanisë privatizuese”.
Dëm tjetër i shkaktuar direkt nga këto vendime, sipas njoftimit, ishte vlera e investuar në hidrocentrale prej 12.6 milionë eurosh, e që nuk përfshin vlerën e aseteve para koncesionit.
Ndërkaq, e pandehura F.H., në cilësinë e personit zyrtar – menaxhere në projektin për privatizim, e autorizuar nga Ministria e Zhvillimit Ekonomik, Arben Gjuka, në cilësinë e Drejtorit Menaxhues në KEK, B.H koordinator për shturje të KEK-ut dhe anëtari i Bordit të ZRRE-së K.B. “secili ndaras, me qëllim që të i mundësojnë çfarëdo përfitimi pasuror dhe që të shkaktojë dëm personit tjetër, i kanë tejkaluar kompetencat e veta. Me këto veprime të pandehurit e lartcekur kanë kryer veprën penale ‘Keqpërdorimi i pozitës apo autoritetit zyrtar’ nga neni 422 paragrafi 2 të Kodit Penal të Republikës se Kosovës”.
Ndërsa të akuzuar Fadil Çitaku si kryesues i Bordit të KEK-ut dhe anëtarët M.R., A.N., F.K. dhe I.I. si dhe G.J. si kryesues i Bordit të KKDFE-së, dhe B.B., G.Sh., N.H. dhe A.A. si anëtarë të bordit po ashtu akuzohen se kanë tejkaluar kompetencat e veta.
Të gjithë akuzohen për keqpërdorim të pozitës.