Europol: Shqipëria, furnizuesi kryesor i kanabisit në BE

Shqipëria mbetet një nga vendet kryesore të kultivimit dhe trafikimit të kanabisit drejt vendeve të Europës. Organizata europiane për luftën kundër krimit dhe trafikut të organizuar “Europol” ka publikuar një raport lidhur me situatën e drogës në kontinent. Ku janë përfshirë në studim 28 vende. Në këtë raport ka të dhëna për trafikun e lëndëve narkotike që zhvillohet në të gjithë kontinentin europian. Fokus të veçantë në raport ka sidomos zona e Mesdheut, për shkak se këtu bëhet transporti më i madh i drogës, në rrugë detare. 

Porsa i përket Kanabisit, Shqipëria konsiderohet dhe si vend burimi. “Shqipëria mbetet burimi kryesor i kanabisit të trafikuar në Europë. Gjithashtu, edhe disa lloje të tjera kanabisi si ajo rrëshirë transportohen në vendet e BE-së nga vende të tilla si Maroku ose Libia. Transporti i drogës bëhet përmes Detit Mesdhe dhe rrugëve të tjera ujore”, thuhet në raport.

Po ashtu studimi ka përcaktuar dhe linjat e trafikut nga vendi i origjinës së drogërave drejt Italisë, Holandës apo vendeve të tjera të Bashkimit Europian. Në një prej hartave tregohet sesi Shqipëria është një vend ku prodhohet Kanabisi, e cila më tej shpërndahet për në Greqi, Itali dhe në Francë. Kurse në një tjetër hartë, dëshmohet sesi Shqipëria është jo vetëm vend prodhues i lëndëve narkotike, por edhe vend tranzit. Kanabisi që prodhohet në Afganistan vjen në Shqipëri dhe se prej këtej dërgohet për tregtim në Holandë. Gjithashtu, heroina e prodhuar në Pakistan kalohet përmes Ballkanit dhe se më tej dërgohet në Itali dhe në Holandë.

Raporti gjithashtu jep dhe të dhëna mbi rritjen e grupeve kriminale që janë përfshirë në tregtinë e drogërave. Tashmë janë 5 mijë organizata kriminale ndërkombëtare që prekin 180 vende që kryejnë aktivitetin e trafikimit. Ndërkohë në total, grupet fitojnë 24 bilion euro në vit prej këtij aktiviteti. Por këtu përfshihen të gjithë drogërat, si kanabisi, drogërat sintetike etj. raporti ndër të tjera evidenton se tashmë mbi 35 për qind e grupeve kriminale janë përfshirë në këtë aktivitet, teksa përdoret çdo lloj mjeti i mundshëm për kalimin nga njëri shtet në tjetrin. Alarmi duket se është i lartë në strukturat e luftës ndaj narkotrafikut, pasi rezulton se në vitin 2013 ishin përfshirë 3600 grupe ndërkombëtare në trafikun e lëndëve narkotike. Në raport saktësohet se grup ndërkombëtar kriminal, cilësohen ato organizata që janë të shtrira në më shumë se dy shtete.

Gjithsesi, porsa i përket Shqipërisë, raporti nuk përmend të dhëna konkrete mbi kultivimin e kanabisit, apo dhe periudhën në të cilin është prodhuar ai. Por nënvizohet se Shqipëria mbetet në vendin kryesor të furnizimit të vendeve të Bashkimit Evropian. Raporti vjen në kohën kur thuajse në çdo ditë në brigjet italianë kapen skafe më lëndën narkotike. Madje, pak kohë më parë ka qenë ambasadori i OSBE-së në Shqipëri Bernd Borchardt, ka deklaruar se janë 3 miliardë euro para të ardhura nga kanabisi që mund të përdoren në zgjedhjet parlamentare. Në një dalje të dytë për mediat, ai ka nënvizuar se këto para janë krijuar prej kanabisit të vitit 2013.

5000 grupe ndërkombëtare kriminale janë evidentuar si të përfshira në trafikun e lëndëve narkotike, nga 3600 që ishin në vitin 2013

Rreth 24 bilion euro në vit llogariten fitimet nga grupet kriminale në mbarë botën vetëm nga trafiku i drogërave

Më shumë se 35 për qind e grupeve kriminale në Bashkimin evropian janë të përfshirë në trafikun e drogërave

6 janë format e njohura për trafikimin e drogërave drejt BE. Me korrier, barka, skave, kontejner, maune dhe avionë të vegjël

5 janë format e qarkullimit të drogërave në BE. Me korrier, makina të vogla, autobus, maune dhe avionë të vegjël

Shqipëria nuk përfshihet në rrjetin e trafikut të drogërave sintetike të kthyer në shqetësim serioz

Ballkani konsiderohet rruga më e shpejtë e trafikut të Heroinës nga Pakistani drejt Italisë dhe Norvegjisë.