‘U shku me vra Ganinë’, dëshmitari rrëfen se çfarë dëgjoi në mal
Ekskluzive: Kjo është skema kriminale e punësimeve në Komunën e Prishtinës
Kandidatët për kryetar të Prishtinës: Arban Abrashi, Arbër Vllahiu e Lirak Çelaj kanë akuzuar Shpend Ahmetin për punësime partiake në komunë dhe në institucionet e tjera publike, që i ka mbuluar Komuna. Ata thonë se kryetari aktual i Prishtinës ka përdorur skema perfide për të eliminuar kandidatët tjerë duke favorizuar ata partiakë, ndërkohë që kryeqytetasit janë diskriminuar nga militantët e VV-së të komunave tjera. Gjithashtu, administrata e Shpend Ahmetit akuzohet se aplikantët për punë i ka kushtëzuar edhe me kalim në Vetëvendosje. Sipas tyre, punësimet të tilla, kanë ndodhur kryesisht në shkolla e në sektorin e shëndetësisë
Arban Abrashi, Arbër Vllahiu e Lirak Çelaj tregojnë se si gjatë takimeve me qytetarët kanë marrë ankesa për punësime partiake dhe parregullsi të tjera gjatë qeverisjes së Shpend Ahmetit në Prishtinë. Të tre kandidatët janë zotuar për trajtimin e barabartë të qytetarëve pavarësisht bindjeve politike.
Kandidati i LDK-së për Prishtinën, Arban Abrashi, konsideron se banorët e Prishtinës janë të diskriminuar nga qeverisja komunale, ai tha të premten për Express se nga rreth 500 të punësuar të paligjshëm në administratën komunale, numri i atyre që janë nga Prishtina është minimal, sipas tij, shumica janë militantë të Vetëvendosjes nga të gjitha komunat e Kosovës.
“Në sektorin e arsimit, mësimdhënësit dhe drejtorët që janë pranuar, janë shumica nga komunat e tjera. Kështu ka ndodhur edhe në sektorin e shëndetësisë dhe në të gjitha fushat tjera që i ka mbuluar komuna”, thotë Abrashi.
Abrashi ka dhënë shembuj se si gjatë një testimi ka pasur raste kur specialistët e mjekësisë i kanë pyetur për sistemin diellor.
“Qëllimi ka qenë që t’i skualifikojnë mjekët dhe specialistët e Prishtinës dhe t’i punësojnë të tjerët”- thotë ai.
Ai thotë se kandidatët e Prishtinës që i kanë plotësuar kushtet, vetëm ua kanë cingëruar telefonin dhe më pas ua kanë bllokuar numrin, në mënyrë që t’i evidentojnë se ata nuk i janë përgjigjur ftesës për intervistë.
“Një kuadro e Prishtinës me master të gjeodezisë, ia kanë cingëruar telefonin, ai ka provuar me ditë të tëra të telefonoj dhe nuk ka pasë mundësi. Për pasojë në vend të tij është pranuar një kandidat me shkollë të mesme nga një komunë tjetër”- tregon tutje Abrashi.
Kandidati i AAK-së për Prishtinën, Abër Vllahiu, ka thënë për Express se ka pranuar ankesa nga qytetarët për punësime partiake, dhe si janë punësuar vetëm simpatizantët e Vetëvendosjes.
“Në takimet me qytetarët ka pasë jo vetëm ankesa për mospunën dhe moszgjidhjen e problemeve të shumta në qytet, por ka ankesa tepër të mëdha për punë selektive në pjesë të ndryshme të qytetit dhe vetëm aty ku partia në pushtet e simpatizantët e saj kanë përfituar. Ka edhe ankesa për punësime partiake edhe në ndërmarrje publike”- tha Vllahiu të premten për Express.
Tutje Vllahiu konsideron se Prishtina po trajtohet si pronë private, ai thotë se në Prishtinë do të funksionojë ligji dhe do të zbatohet në çdo rast edhe në fushën e punësimit.
“Prishtina dhe qytetarët e saj do të trajtohen në mënyrë të barabartë”- përfundoi Vllahiu.
Kandidati i PDK-së për Prishtinën, Lirak Çelaj, thotë se dukuria e punësimeve partiake është në të gjitha institucionet ku e ka shtrirë pushtetin Vetëvendosja.
Çelaj në një bisedë telefonike për Express tha se vazhdimisht kanë marrë ankesa prej qytetarëve që janë shpërfillur ose kushtëzuar që të bëhen anëtarë të Lëvizjes Vetëvendosje në mënyrë që të punësohen.
“Edhe ne kemi marrë ankesa të shumta si nëpër shkolla, QKMF, administratë, ndërmarrje publike-banesore. Prandaj ne edhe e kemi ngritur çështjen e punësimit, ajo që është më e keqja shumicën e rasteve nuk janë banorë të Prishtinës, por banorë të komunave tjera, të cilët sillen vetëm për t’i financu aktivistët e Vetëvendosjes dhe jo si ekspertë ose nevojë e Komunës së Prishtinës”- tha tutje Çelaj.
“Shpend Ahmeti po sillet si kryetar i Lëvizjes Vetëvendosje dhe jo si kryetar i gjithë qytetarëve të Prishtinës”- përfundoi ai.
PDK-ja ka organizuar disa konferenca për shtyp ku ka prezantuar fakte për punësimet e paligjshme të Shpend Ahmetit në Komunë, shkolla e institucione tjera publike.
PDK ka deponuar kallëzime penale kundër Shpend Ahmetit, siç thonë ata për punësimin e militantëve të VV-së në Komunë.
Ndërsa, Arban Abrashi ka treguar se si është anuluar konkursi për drejtor të shkollës fillore “Elena Gjika” në Prishtinë, pasi që u.d. i kësaj shkolle nuk kishte arritur ta kalonte testin, ndërsa kandidatët e tjerë të Prishtinës u injoruan në këtë konkurs.
“Ushtruesi i detyrës së drejtorit “Elena Gjika” në Prishtinë, i cili si zakonisht vjen nga një komunë tjetër, nuk ka mundur që ta kalojë testin. Për pasojë konkursi është anuluar. Ai ende është ushtrues detyre dhe tani komuna po pret derisa ai ta përfundojë trajnimin për menaxhim në arsim, për t’ia përshtatur atij sërish konkursin. Paramendo sot shkolla “Elena Gjika” është pa drejtor, sepse ushtruesi aktual i detyrës duhet të shkojë 6 muaj në trajnim për t’i plotësuar kushtet për drejtor. Në këtë konkurs ka pasë me dhjetëra kandidatë të Prishtinës që i kanë plotësuar të gjitha kushtet, por janë injoruar”- ka përfunduar Abrashi.
Express ka provuar të kontaktojë edhe me kandidatin e partisë Nisma, Shyqyri Bytyqi, dhe kandidatin e AKR-së, Selim Pacolli, por nuk kanë qenë të qasshëm.