Edhe kjo ndodh në Komunën e Podujevës: Lidhen kontrata dhe kryhen punime pa hartuar paraprakisht projektin ekzekutiv të ndërtimit

Auditori i përgjithshëm në publikimin e raportit për Komunën e Podujevës për vitin 2019 flet për shumë shkelje dhe menaxhim të keq të buxhetit, transmeton PodujevaPRESS.net

Njëra prej tyre është edhe kur Komuna e Podujevës ka filluar procedura të prokurimit dhe kishte lidhur kontrata pa hartuar paraprakisht projektin ekzekutiv të ndërtimit.

Ja çfarë shkruan në raport:

Çështja A3 – Mungesa e projekteve ekzekutive të ndërtimit

Gjetja

Sipas nenit 28.10 të LPP, Autoriteti Kontraktues është përgjegjës për hartimin e Projektit Ekzekutiv, dhe i cili në mënyrë mandatore duhet ti bashkëngjitet (gjithashtu në pajisje elektronike) Specifikave Teknike, të cilat janë pjesë të dosjes së tenderit. Asnjë Autoriteti Kontraktues nuk i lejohet që të lëshojë dokumentacionin e tenderit pa bashkëngjitur përshkrimin e hollësishëm të projektit.

Në tre nga gjashtë raste, procedurat e prokurimit të audituara, komuna ka filluar procedura të prokurimit dhe kishte lidhur kontrata pa hartuar paraprakisht projektin ekzekutiv të ndërtimit. Kjo ka ndodhur për shkak të neglizhencës së njësive kërkuese pa bërë paraprakisht hartimin e projekteve ekzekutive zbatuese dhe mos funksionimi efikas të kontrolleve tek zyra e prokurimit duke zhvilluar procedurat pa u përmbushur kërkesat ligjore.

Inicimi i procedurës së prokurimit në mungesë të projektit ekzekutues rezulton me anashkalim të kërkesës ligjore dhe mund të ndikoj në shpenzime të paparashikuara të buxhetit duke lidhur aneks kontrata për punët e paparashikuara.