Dosja ‘Habilaj’ në duart e Shqipërisë para zgjedhjeve, çfarë ‘tërmeti’ pritet
Gazeta Shekulli shkruan këtë të mërkurë se italianët kanë sjellë në Shqipëri një dosje voluminoze hetimore sa i përket trafikut të drogës në vendin tonë, dosje në të cilën përmendet jo vetëm Mois Habilaj, por edhe një sërë zyrtarësh me imunitet jo vetëm në radhët e policisë.
Rreth katër muaj më parë, më saktë diku para zgjedhjeve, ose në ditët e fundit të fushatës, në drejtim të drejtësisë shqiptare, e cila për pak ditë kishte kaluar në duart e ca të djathtëve që solli marrëveshje e 18 majit mes Edi Ramës dhe Lulzim Bashës, vjen një material voluminoz. Bëhet fjalë për një dosje të madhe me hetime dhe përgjime. Janë disa prokurorë që kanë marrë përsipër hetimin, ndërsa brenda saj gjendeshin emrat e Habiljave, ushtarëve të tij dhe një sërë personash të tjerë.
Janë burime të besueshme hetimore, të cilat saktësojnë se në këtë material hetimor, janë shumë emra të cilët janë përfolur në lidhje me drogën dhe që kanë shërbyer në radhët e policisë, por sipas të dhënave për arsye hetimore janë mbajtur sekret dhe do vijohet të mbahet sekret edhe për pak ditë, derisa prokurorët që kanë marrë përsipër hetimin të lëshojnë edhe urdhër-arrestet e shumta që dalin nga ajo dosje e italianë.
Pra gjithçka ka nisur nga raport i Guardia Di Finanzes për drogën, ku thuhej se u asgjësua mbi 99.8 përqind e drogës në Shqipëri! Shekulli shkruan se ka pasur një manipulim nga ana e policisë shqiptare, pasi i janë dhënë homologëve italianë koordinata të gabuara për të bërë kontrollet nga ajri për parcela me drogë. Kështu, autoritetet italiane nuk mundën të bënin saktësisht monitorimin për shkak të koordinatave të gabuara që iu dhanë homologët shqiptar. Ky të paktën është përfundimi i hetimit tonë, në duart e të cilit tashmë është fati i një dritë-hije të gjatë të një kriminalizimi masiv të strukturave tona të policisë!
Guardia di Finanza kërkoi ndihmë nga prokuroritë e zonave që ishin më pranë brigjeve në Shqipëri duke bërë të mundur kështu mbledhjen e një sërë informacionesh mjaft të rëndësishëm për sa i përket historisë së trafikut të drogës. Në Katania, sigurisht që Antimafia kishte mundur të grumbullonte shumë fashikuj hetimesh dhe përgjimesh, GDF kërkon të dhëna konkrete, atëherë ndërhyhet për të kuptuar fiks se çfarë kishte ndodhur me policinë dhe trafikun ndërkombëtar të drogës.
Del në skenën hetimore konkretisht emri i Moisi Habilajt, i arrestuar dy ditë më parë në Itali si kreu i bandës së trafikut ndërkombëtar të drogës. Më pas edhe i ish-ministrit të Brendshëm Saimi Tahiri i cili përmendet nga Habilaj në përgjimet që kanë kryer ndër vite autoritetet italiane. Dosjet italiane që janë për trafikun e drogës në vendin tonë kanë emra trafikantësh dhe efektivesh policie e deri tek shefa komisariatesh, nëndrejtorë dhe drejtues të drejtorive në qarqe./express