Dezinfektimi i vazhdueshëm i shkollave në Podujevë, problem për komunën

Komuna e Podujevës është e gatshme që nga dita e hënë t’i hapë dyert e shkollave për nxënësit e kësaj komune. Por sfiduese për këtë komunë mbetet dezinfektimi i hapësirave shkollore çdo ditë ashtu siç ka paraparë ministria e Arsimit dhe Shkencës, si dhe ajo e Shëndetësisë.

Ushtruesi i detyrës së kryetarit të komunës së Podujevës, Nexhmi Rudari, thotë se telashe për zbatimin e masave do të kenë më shumë në shkollat në qytet ku numri i nxënësve është më i madh, por siç thotë ai tashmë dezinfektimi është bërë dhe shenjat për distancë i kanë vendosur.

Rudari për KosovaPress ka sqaruar përgatitjet që janë bërë për fillimin e vitit shkollor.

“Sigurisht që kemi bërë planifikime që klasat e mëdha të ndahen në dy grupe dhe të shkurtohet koha, ora nuk do jetë 45 minuta, do të jetë më e shkurtër, por nuk do të ketë më shumë se 15 nxënës ashtu siç kërkojnë rekomandimet. Problem i veçantë do të jetë dezinfektimi i vazhdueshëm siç kërkohet me udhëzimet e ministrisë së Arsimit dhe Shëndetësisë, sepse komunat do ta kenë të pamundur që ta zëmë komuna e Podujevës i ka mbi 70 mijë metra katrorë hapësira shkollore dhe ajo kushton që çdo ditë të dezinfektohet, kushton bukur shumë. Ne do të kemi një kontratë me një operator që bënë dezinsektimi, dezinfektimin dhe deratizimin, por kemi shikuar mundësinë që të bëhet një kontratë e veçantë vetëm më dezinfektimin e hapësirave”, tha Rudari.

Nënkryetari i komunës thotë se përveç aspektit financiar si sfidë për testet për koronavirus, tjetër mbetet përgatitja e personelit në laboratorë të cilët duhet të marrin pjesë në trajnime në Prishtinë.

“E kemi biseduar dhe jemi duke insistuar që të sigurojmë buxhet shtesë që laboratori i mjekësisë familjare në Podujevë e që është i pajisur mirë dhe disa laborantë veç se kanë qenë në Prishtinë për trajnime një ose dy ditore që të fillojmë edhe ne me shërbimet për testime të COVID-19 me QKMF. Besoj që nuk do të jetë problem vetëm aspekti financiar sepse komuna është e gatshme të ndaj buxhet, por janë edhe përgatitjet e laboratorit dhe të personelit që duhet të trajnohen në Prishtinë për të kryer këto testime”, tha Rudari.

Rudari ka thënë se stafi mjekësor i disa QKMF-ve në fshatra kanë kaluar në Qendrën Kryesore të Mjekësisë Familjare në Podujevë me qëllim që të ofrohen më shumë kapacitete në ndihmë të pacientëve me koronavirus.