Antonio Cassano ka qenë në planet e Flamurtarit që në afatin kalimtar të verës. Një fakt të tillë e ka zbuluar për “Panorama Sport” vetë administratori i Flamurtarit, Sinan Idrizi,transmeton Express.

“Antonio Cassano ka qenë në bisedime me ne që në verë. Pra ka qenë në planet tona”, u shpreh Idrizi.

Ndërkaq, në rrjetet sociale ka qarkulluar një lajm se Cassano ka qenë dje në Tiranë për t’u takuar me Idrizin. “Unë jam në Tiranë sot (dje), por jo për t’u takuar me Cassanon”, ka theksuar ai.

E ndërsa gjasat që Cassano të vijë në Vlorë janë të pakta, numri një i klubit vlonjat thotë se ylli i Flamurtarit mund të jetë një tjetër.

“Klubi është në diskutime me dy-tre lojtarë, yje të kalibrit të lartë. Ne jemi në bisedime me emra të mëdhenj që nuk kanë ardhur ndonjëherë në Shqipëri dhe nuk ka kush t’i sjellë tjetër veç nesh”, ka deklaruar ai.

“Jemi në bisedime me një lojtar shumë të kuotuar në treg, por nuk mund të zbuloj emra. Janë lojtarë që është ëndërr që t’i kesh në skuadër dhe nuk e di nëse do të pranojnë të vijnë, ndaj nuk dua që të nxitohem. Jemi në bisedime”, përfundoi Idrizi.

/PodujevaPRESS/