Bulliqi asesi të rehatohet me drejtor të shkollave, jep dorëheqje edhe një drejtor në Podujevë

Drejtori i Gjimnazit “Aleksandër Xhuvani”, Liridon Mulliqi ka dhënë dorëheqje nga kjo pozitë, të paktën kështu ju është kumtuar lajmi kolektivit të shkollës, I kanë thënë PodujevaPRESS-it burimet brenda shkolle.

Arsyet e dorëheqjes sipas Mulliqit janë personale.

E ditë më parë sipas burimeve të PodujevaPRESS dorëheqje ka dhënë edhe UD I Zv/Drejtorit të Shkollës së Mesme Ekonomike “Isa Boletini” në Podujevë, Xhevdet Rrahimi.

Ndërsa komuna e Podujevës ka njoftuar se shtatë drejtorë janë zgjedhur në institucionet shkollore të Podujevës, ndërsa në tri shkolla ka dështuar konkursi për drejtor e zëvendësdrejtorë.

Zyrtarët komunalë të Podujevës kanë thënë se në shkollat ku ka dështuar zgjedhja e drejtuesve të këtyre institucioneve do të përsëritet konkursi.

“Drejtoria e Arsimit më 20.02.2023 ka hapur konkurse për drejtorë dhe zëvendësdrejtorë në shtatë shkolla fillore dhe një shkollë të mesme. Pas përfundimit të të gjitha procedurave janë zgjedhur drejtorët në shkollat SHFMU ‘Emin Duraku’ në Bajçinë, SHFMU ‘Shaban Shala’ në Podujevë, SHFMU ‘Musli Dumoshi’ në Dumosh, SHFMU ‘Naim Frashëri’ në Podujevë, SHFMU ‘Ali Hadri’ në Obrançë, SHFMU ‘Hyzriu e Samiu’ në Letancë dhe IAAP ‘Isa Boletini’, ndërsa është zgjedhur edhe zëvendësdrejtori në SHFMU ‘Naim Frashëri’ në Podujevë”, ka thënë Fatri Zhitia, zëdhënës në Komunën e Podujevës.

Sipas tij, me këtë konkurs nuk është arritur të zgjidhet drejtori në ShFMU “Jetullah Gashi” dhe e zëvendësdrejtorët në SHFMU në “Shaban Shala” dhe IAAP “Isa Boletini”.

“Pas shqyrtimit të aplikacioneve nga komisioni përkatës ka vendosur të përsëritet konkursi në këtë tri institucione pasi që nuk janë përmbushur kërkesat e përgjithshme që dalin nga protokolli i intervistës (nga neni 8 paragrafi 2.6.1 pika 4 paragrafi 4.1 – Formulari C)”, ka theksuar ai.