Bizneset në Podujevë kërkojnë rishikimin e rregullores për orarin e punës për të dielën

Rregullorja për orarin e punës për biznese në Komunën e Podujevës do t’u hyjë procedurave të plotësim-ndryshimit një vit pasi është miratuar.

Pronarë dyqanesh po kërkojnë që t’u lejohet puna edhe ditëve të diela, që tash për tash këtë e ndalon Rregullorja e lartcekur.

Rexhep Zeka, i cili ka folur në emër të pronarëve të dyqaneve në fshatin Orllan, ka thënë se bizneset e tyre varen kryesisht prej turizmit që zhvillohet në këtë pjesë të Podujevës, pikërisht ditëve të vikendit.

“Ne për këtë arsye kemi kërkuar edhe në qershor të vitit të kaluar që të bëhet rishqyrtimi i kësaj Rregulloreje, plotësimi i kësaj Rregulloreje, pra që të dielave të lejohen vendet specifike siç është Orllani për të punuar. Të njëjtën kërkesë e kemi drejtuar edhe te administrata e re e komunës dhe presim shumë shpejt që të bëhet plotësim-ndryshimi i kësaj Rregulloreje dhe të dielave të lejohemi të punojmë”, ka thënë ai.

Si opsion, nga Komiteti për Zhvillim Ekonomik, është propozuar që e diela të zëvendësohet me një ditë tjetër.

“Gjithashtu, kemi pas edhe rekomandime për pjesën tjetër të qytetit të Podujevës që të caktohet një orar për bizneset dhe të kategorizohen bizneset në bazë të punëve që i kryejnë ato. Zakonisht që bizneset ushqimore të punojnë me një orar 3-4 orësh që të mos e kemi problem të dielave të shkojmë jashtë qytetit të Komunës së Podujevës për furnizime të zakonshme”, ka thënë Egzon Zhjeqi-kryesues i Komitetit për Zhvillim Ekonomik .

Drejtori për Planifikim dhe Zhvillim Ekonomik, Pajtim Balaj, ka bërë të ditur se për çështjen e kësaj rregulloreje i kanë pranuar dy kërkesa: prej dyqaneve të vogla familjare që kërkojnë të punojnë edhe të dielave, dhe tjetra, nga punëtorët e sektorit privat, të cilët duan që e diela të jetë ditë pushimi.

“Përgjigja jonë duhet të jetë sigurisht njëfarë harmonie në mes të dy kërkesave që na kanë ardhur dhe zgjidhja që ne po përpiqemi që ta bëjmë është që t’iu mundësojmë që bizneseve të vogla familjare të punojnë gjatë ditëve të diela, duke iu mundësuar punëtorëve të sektorit privat të bizneseve që janë më të mëdha që këtë ditë ta kenë pushim”, ka thënë Balaj.

Sipas tij, kjo do t’iu mundësonte dyqaneve të vogla që të kompensojnë humbjet gjatë ditëve të tjera që i kanë nga konkurrenca e madhe e qendrave tregtare.

Rregullorja për orarin e punës së bizneseve në Komunën e Podujevës është miratuar në fillim të vitit 2020.

Ndërkohë që bizneset dhe banorët e fshatit Orllan vitin e kaluar e kishin dorëzuar edhe një peticion, ku kërkonin që dyqaneve këtu t’u lejohet puna edhe të dielave.