Besnik Tahiri siguron ulëse në Kuvend

Besnik Tahiri nga AAK-ja ka siguruar vota të mjaftueshme për t’u bërë deputet në legjislaturën e ardhshme, shkruan Indeksonline.

Kështu ka njoftuar ai përmes një postimi në Facebook, ku tha se në total ka marrë 7 mijë e 815 vota.

“Ju siguroj se do të mbetem i përkushtuar, me plot pasion, në përfaqësimin e besimit tuaj.

Me liderin tonë Ramush Haradinaj dhe Aleancën, do të jemi plotësisht të përkushtuar për përfaqësimin e plotë dhe të barabartë të të gjithë qytetarëve të Republikës së Kosovës”, tha ai.

Njoftimi i plotë:

Të dashur qytetarë,

Nga publikimi i rezultateve të KQZ-së për votimet e 14 shkurtit 2021, doli se 7 mijë e 815 prej jush më keni dhënë besim për t’ju përfaqësuar në Kuvendin e Republikës së Kosovës.

Ky është një nder i madh që më keni bërë!

Si përherë, jam falënderues për secilin prej jush, e për shumë të tjerë, që jo vetëm tashti kur fitova, por edhe për katërmbëdhjetë vjetët e kaluar, kur nuk kisha sukses të mjaftueshëm për t’ju përfaqësuar, më keni përkrahur, më keni besuar e më keni qëndruar pranë në rrugëtimin tim jo të lehtë politik.

Sikur që e theksova, kam marrë pjesë në shumë gara politike e zgjedhore, lokale e nacionale dhe pavarësisht votave që nuk ishin të mjaftueshme, asnjëherë nuk u ndala e as nuk u demotivova për të vazhduar e garuar sërish. Përkundrazi, pamundësia e përfaqësimit tuaj ishte motivi shtesë që gjithnjë më shtynte t’ju shërbej në detyra e kapacitete të tjera e të ndryshme.

I gjithë rrugëtimi im ka dy rrëfime: i pari, se asnjë arritje nuk është e lehtë, dhe i dyti, se nuk duhet hequr dorë, kurrë, nga ajo në çfarë beson. Unë nuk e pata lehtë, por besova në konceptin tim politik dhe në Ramushin dhe falë jush, fitova!

Ju siguroj se do të mbetem i përkushtuar, me plot pasion, në përfaqësimin e besimit tuaj.

Mbetem i fokusuar që të shtyj përpara reformat politike e legjislative në administratë e shërbime, e posaçërisht në avancimin dhe forcimin e komunave. Prioritet imi si përfaqësues juaji do të jetë, para së gjithash, adresimi, ngritja dhe përkrahja e kërkesave, pritjeve dhe shqetësimeve tuaja. Ato, për mua, do të jenë gjithmonë të drejta.

Me liderin tonë Ramush Haradinaj dhe Aleancën…, do të jemi plotësisht të përkushtuar për përfaqësimin e plotë dhe të barabartë të të gjithë qytetarëve të Republikës së Kosovës.

Faleminderit!