Batatina: Llapi ka potencial për ta kaluar Buduqnostin

Trajneri i Llapit, Tahir Batatina ka thënë se ka futbollist me potencial për ta kaluar Buduqnostin e Malit të Zi. Llapi që merr pjesë për herë të dytë në kualifikimet e Ligës së Konferencës, emrin e kundërshtarit të raundit të parë e mësoi të martën gjatë tërheqjes së shortit në Nyon të Zvicrës.

Batatina ka thënë se pozitive është që Llapi nuk do të ketë udhëtim të gjatë.

“Nuk është skuadër për t’u nënvlerësuar. Ka pasur rezultate të mira, ndërsa ne duhet ta bëjmë më të mirën. Duhet ta japim maksimumin dhe përparësi mund të them është që ndeshjen e kthimit e luajmë në shtëpi. Duhet ta japim maksimumin, pasi kemi të bëjmë me një kundërshtar që ka mentalitetin e njëjtë. Afërsia na ndihmon shumë. Në bazë të ekipit që kemi dhe përfocimeve, kemi potencial për të ecur tutje”, ka thënë Batatina për KOHËN.

Ai pret që ndeshja e kthimit të luhet në “Zahir Pajaziti” në Podujevë. Ndeshja e parë luhet më 7 korrik.

“Llapi besoj se do të luaj në ‘Zahir Pajaziti’. Kemi bërë kërkesë për licencim të stadiumit, ndërsa Federata ka mbetur të marrë miratimin nga organet e UEFA-s. Jemi në përfudim të punimeve për të plotësuar kushtet e kërkuara. Besoj se 10 ditë para ndeshjes do të jetë gjithçka në rregull. Jemi tri skuadra që ndeshjet e kthimit do t’i luajmë si venas dhe do të të jetë problem, pasi aktualisht vetëm ‘Fadil Vokrri’ plotëson kriteret, por besoj se edhe ‘Zahir Pajaziti’ plotëson kushtet për t’u luajtur ndeshjet në këtë nivel garash”, është shprehur Batatina.

Llapi është fitues i Kupës së Kosovës për të dytin vit rresht.