Apostolova: Dështimi i projekteve në veri, për fajin e autoriteteve lokale

Vendimin për anulimin e projektit për ndërtimin e Universitetit dhe Qendrës Kulturore në Mitrovicën veriore, e kanë sjellë institucionet e Bashkimit Evropian në Bruksel, dhe ky vendim nuk ka asnjë lidhje me revitalizimin e urës kryesore mbi lumen Ibër në Mitrovicë, ka deklaruar të enjten shefja e Zyrës së Bashkimit Evropian në Kosovë, Nataliya Apostolova.

Bashkimi Evropian, javën e kaluar ka anuluar projektet me vlerë prej 7.8 milionë euro, për shkak se autoritetet komunale të Mitrovicës veriore nuk i kanë larguar objektet e ndërtuara në mënyrë ilegale, në afërsi të hapësirës ku do të duhej të fillonin ndërtimet, gjë që ishte e domosdoshme për qasje në zonat e ndërtimit.

Gjatë një interviste me një grup të gazetarëve, Apostolova, ka thënë se kryetari i Komunës së Mitrovicës veriore, Goran Rakiq, paraprakisht kishte premtuar se do ta zgjidhë këtë çështje. Sipas saj, vendimi për anulim të projekteve nuk ka qenë i lehtë dhe ai ka pasuar pas bisedimeve të rënda. Megjithatë, siç ka thënë Apostolova, BE-ja ka procedura të caktuara, për më tepër kur bëhet fjalë për paratë e qytetarëve të Bashkimit Evropian.

“E kuptuam që ekzistojnë probleme të caktuara që ndërlidhen me këto projekte. Për tetë muaj kemi komunikuar me administratën lokale në Mitrovicën veriore. Kushti i parë për fillimin e projektit është që të krijohet mundësia për qasje në vendin, gjë që është në përgjegjësinë e Komunës që ta zgjidhë. Kryetari i Komunës ka qenë i vetëdijshëm që kjo duhet të mundësohet në muajin prill. Fatkeqësisht, në rrugën dhe në afërsi të hapësirës ekzistojnë objekte jolegale, gjë që është në përgjegjësinë e Komunës që ta zgjidhë këtë”.

“Pastaj, pasoi komunikimi me kryetarin e Komunës dhe kolegët e tij, dhe të gjithë kanë qenë të informuar se çfarë duhet të bëjnë. Fatkeqësisht, asgjë nuk është ndërmarrë. Veprimi ynë i fundit, pas skadimit të afatit, ka qenë që ta sjellim zyrtaren e lartë nga Brukseli që ta vizitojë Mitrovicën e veriut, e cila ia ka shpjeguar seriozitetin e situatës kryetarit të Komunës. Pas vazhdimit të afatit, përsëri nuk ka ndodhur asgjë. Ne ishim vënë në situatën që nuk kemi mundur asgjë të bëjmë, përveç t’i anulojmë projektet”, ka thënë Apostolova, e cila ka shtuar se vendimin e kanë mbështetur edhe ambasadat e Gjermanisë dhe Francës në Prishtinë.

Në anën tjetër, kryetari i Komunës së Mitrovicës veriore, Goran Rakiq, ditë më parë ka thënë se anulimi i projekteve është bërë për shkak se përfaqësuesja speciale e BE-së në Kosovë, Nataliya Apostolova, ka kërkuar nga Komuna që të mundësohet vazhdimi i revitalizimit të urës kryesore mbi lumin Ibër, “pa ndonjë garanci për ruajtjen e sigurisë së qytetarëve”. Rakiq, në prill të këtij viti, ka urdhëruar ndërprerjen e punimeve për revitalizimin e urës, për shkak të një varg incidentesh, të cilat siç është thënë, e rrezikojnë sigurinë e qytetarëve.

Por, Apostolova, gjithashtu ka thënë se ky vendim nuk ka asnjë ndërlidhje me revitalizimin e urës, ashtu siç ka deklaruar Rakiq.

“Nuk ka asnjë lidhje ndërmjet këtyre dy projekteve me urën. Nuk ka kurrfarë ndikimi politik prapa këtij anulimi”, theksoi Apostolova.

Ndërkohë, zyrtarët e Policisë së Kosovës, patën theksuar se situata në Mitrovicë të veriut, në periudhën e fundit është e qëndrueshme dhe se nuk ka pasur incidente të mëdha.

Por, disa studentë të Universitetit serb të Mitrovicës veriore, por edhe përfaqësues të organizatave joqeveritare, i kanë dhënë mbështetje Rakiqit.

Nemajnja Bishevac, studenti prorektor në Universitetin serb në Mitrovicë të veriut, shpreh mendimin që vendimi i Bashkimit Evropian, nuk është i mirë as për universitetin e as për qytetin, por, siç thotë ai, bazuar në përvojat me BE-në në vitet e kaluara, ai beson në atë që e thotë kryetari i Komunës së Mitrovicës së veriut, Rakiq.

“Besoj që vetëqeverisja lokale ka bërë gjithçka që ka qenë në fuqinë e saj. Si student prorektor, kam qenë i përfshirë në këto zhvillime, sa i përket universitetit. Mendoj se versioni të cilin e ka komunikuar BE-ja nuk ka fare të bëj me të vërtetën”, tha Bishevac.

Filip Fiçoviq, student i Fakultetit Juridik në Universitetin serb në Mitrovicë të veriut, konsideron që me anulimi i projektit është humbje për studentët dhe qytetin.

“Konsideroj që BE-ja nuk ka pasur mjaft mirëkuptim për Mitrovicën, banorët e saj dhe për vetë studentët që vijnë këtu”, tha Fiqoviq.

Dushan Radakoviq, drejtor ekzekutiv i organizatës joqeveritare Qendra për përfaqësim të kulturës demokratike, shpreh mendimin se vendimi i Rakiqit për të ndaluar punimet në urë, ka pasur bazë reale, për shkak se sipas tij, incidentet e shumta brenda një periudhe të shkurtë kohore, janë tregues i mungesës së sigurisë së qëndrueshme.

“Në këtë moment, vërtetë nuk është situatë e mirë e sigurisë edhe për shkak të zgjedhjeve të ardhshme (lokale), por edhe për shkak të mosformimit të Qeverisë, si dhe problemeve tjera. Pajtohem me kryetarin e Komunës, i cili i ka ndalur punimet në këtë moment, sepse derisa të gjendet një zgjidhje më e mirë për aspektin e sigurisë, mund të nisin problemet tjera. Prandaj, mendoj që situata e sigurisë mund të zgjidhet dhe në këtë të jetë pjesëmarrëse Policia dhe gjykatat, në mënyrë që punimet të vazhdojnë”, tha Radakoviq.

Punimet në urën kryesore mbi lumin Ibër, i cili ndodhet ndërmjet anës jugore dhe asaj veriore të qytetit, vazhdojnë të ngecin, sepse Rakiq, në prill të këtij viti, ka urdhëruar ndërprerjen e punimeve, për shkak të një varg incidentesh, të cilat siç është thënë, e rrezikojnë sigurinë e qytetarëve. Ai ka kërkuar nga organet e sigurisë, vendore dhe ndërkombëtare, që ta garantojnë sigurinë e qytetarëve.

Ura, revitalizimin e të cilës e financon BE-ja, është dashur të hapet në janar të vitit 2017, por për shkak të ndërtimit të një muri mbështetës në pjesën veriore, e më pas edhe shembjen e tij, afati është zgjatur. Projekti është me vlerë prej rreth 1.5 milion euro dhe atë e përcjellë edhe shndërrimi i rrugës “Mbreti Pjetër” në zonë të këmbësorëve.