Aksident në Bajçinë të Podujevës, lëndohen dy persona |Pamje
A tentoi t’i pajtojë Isa Mustafa Vjosa Osmanin e Agim Veliun?
Pavarësisht përplasjeve që i patën gjatë javës që lamë pas, nënkryetarët e LDK-së, Agim Veliu e Vjosa Osmani u dukën fort në disponim para nisjes së takimit me kryetarët e degëve, derisa, qëndronin ulur në krah të kryetarit të partisë, Isa Mustafës, raporton Gazeta Express.
Pas mbledhjes që zgjati gati dy orë, e që Mustafa e thirri për t’i informuar kryetarët e degëve lidhur me zhvillimet e fundit sa i përket koalicionit me VV’në, kreu i LDK’së qëndroi për një kohë pas përfundimit të takimit në Selinë Qendrore me nënkryetarin e parë të partisë që ia udhëheq, Agim Veliun, e nënkryetaren Vjosa Osmani.
Ani pse gazetarëve iu tha fillimisht se nuk do të deklarohet askush nga partia para mediave, Mustafa pak minuta më vonë doli vetë nga zyret e selisë, i shoqëruar nga Veliu.
Para mediave Mustafa e ritheksoi se nuk kanë hequr dorë nga pozita e të parit të shtetit, e se tha se në ditët në vazhdim të njejtin qëndrim të partisë, do t’ia transmetojë edhe Këshillit të Përgjithshëm.
Kujtojmë që javën që lamë pas, Veliu dhe Osmani u përfshinë në një përplasje e nisur nga nënkryetari i parë i partisë, kjo pasi që kandidatja për kryeministre u regjistura si deputete në të njejtën kohë me të parin e VV-së, Albin Kurtin.
Veliu e vuri në dyshim paraqitjen e Osmanit së bashku me Kurtin në Kuvend, duke thënë se kandidatja për kryeministre në këtë mënyrë do që ta vërë në presion LDK-në për të arritur marrëveshje koalicioni me VV’në.
“Ajo duhet t’u japë sqarim votuesve të LDK-së se çka po do të japë mesazh me këto rastësi. Sipas gjykimit tim, nëse dikush merr obligime që nuk i takojnë, aty komplikohet situata”, ka thënë Veliu.
“Ne është dashtë me i bë presion atij (Kurtit v.j.), me punu sa më shumë, në mënyrë që sa më shpejt me u bo qeveria. Pra, që ai me e ofru ofertën dhe LDK-ja me vendosë se a është e pranueshme apo jo”, deklaroi ai.
Kësaj deklarate iu është kundërpërgjigjur duke folur për Express, nënkryetarja e LDK’së Vjosa Osmani.
Osmani tha se një deklaratë e tillë është qëllimkeqe dhe e bazuar në gjëra të pavërteta.
“Deklaratë qëllimkeqe e tendencioze e bazuar në të pavërteta. E vërteta është ajo që e kam thënë unë e bazuar edhe në video e dëshmi. Komplikuesit e vërtetë tashmë dihen”, deklaroi Osmani.
Tutje Vjosa Osmani ka thënë se Agim Veliu duhet të harrojë që mund të marrë sqarime, pasi siç thotë Osmani raporti i saj është me votuesit.
Osmani dhe Veliu ka një kohë që nuk kanë pasur raporte të mira, e ky i fundit u përfol si një nga kundërshtarët kryesorë që Osmani të nominohej për pozitën e kryeministrit./GazetaExpress/