A do të ketë tubime elektorale të partive politike në Podujevë?! Flet Ministri Zemaj

Ministri i Shëndetësisë, Armend Zemaj, ka thënë se zgjedhjet e 29 nëntorit në komunën e Podujevës dhe atë të Mitrovicës së veriut do të zhvillohen nën masa ndryshe nga herat e tjera.

Ai ka njoftuar se me Bordin Këshilldhënës është vendosur që “të respektohen me rigorozitet ligjin, vendimet, udhëzuesit dhe protokollet në fuqi”, që të mos lejohet rritje e numrit të të infektuarve me koronavirus.

Zemaj në Facebook ka thënë se ditët e ardhshme do të dalin me hapa konkret për t’i rekomanduar KQZ-së mënyrën e mbajtjes së zgjedhjeve.

“Edhe në kohë fushatë, por edhe çdo ditë tjetër deri sa jemi në kohë pandemi tubimet dhe grumbullimet janë të ndaluara, andaj në organizime të tilla, ku rrezikohet shëndeti publik, gjithsesi duhet të veprohet sipas vendimeve në fuqi dhe nuk duhet të ketë tolerime për askënd”, ka shkruar Zemaj.