Tragjedia në Liqenin e Batllavës ngre alarmin për sigurinë – A është koha për masa më të rrepta në liqen?

Forca e Sigurisë së Kosovës (FSK) ka bërë të ditur se ka gjetur trupin e pajetë të personit që ishte zhdukur në Liqenin e Batllavës, pas një operacioni kërkim-shpëtimi që zgjati dy ditë.

Në njoftimin zyrtar, FSK bëri të ditur se ekipet e saj të kërkim-shpëtimit, në bashkëpunim me Policinë e Kosovës dhe strukturat komunale të Podujevës, arritën ta lokalizojnë dhe ta nxjerrin trupin nga liqeni.

“Pas dy ditë kërkimesh, ekipet e kërkim-shpëtimit të FSK-së kanë arritur të gjejnë trupin e pajetë të personit të zhdukur në Liqenin e Batllavës”, thuhet në njoftimin e FSK-së.

Ngjarja tragjike ka rikthyer në vëmendje çështjen e sigurisë në Liqenin e Batllavës, një nga zonat më të frekuentuara nga qytetarët gjatë sezonit veror.

Shtrohet pyetja nëse institucionet komunale dhe ato qendrore duhet të ndërmarrin masa shtesë për të parandaluar raste të tilla. Një prej kërkesave që dëgjohet gjithnjë e më shpesh është vendosja e rregullave më të rrepta për lundrimin me barka, duke e bërë të detyrueshme përdorimin e jelekëve shpëtues për çdo person që hyn në ujë me mjet lundrues.

Po ashtu, qytetarët rikujtohen se larja në Liqenin e Batllavës është e ndaluar, pasi ai shërben si burim i ujit të pijshëm dhe mbrohet me rregulla të veçanta.

Një jetë e humbur është shumë. Prandaj, kjo tragjedi pritet të nxisë diskutime për rritjen e masave të sigurisë, kontrollit dhe ndërgjegjësimit, në mënyrë që raste të ngjashme të mos përsëriten në të ardhmen.