27-vjet nga çlirimi i Prishtinës – më 11 qershor 1999 Komanda e Zonës Operative të Llapit u vendos në kryeqytetin e lirë

Sot mbushen 27 vjet nga çlirimi i Prishtinës, dita kur Ushtria Çlirimtare e Kosovës vendosi kontrollin në kryeqytet dhe Komanda e Zonës Operative të Llapit (ZOLL) u vendos zyrtarisht në Prishtinë.

Sipas komunikatës së lëshuar më 11 qershor 1999 nga Komanda Ushtarake e Zonës Operative të Llapit, njësitë gardiste të saj, së bashku me guerilën BIA, e cila për një kohë të gjatë kishte vepruar në kryeqytet, tashmë kishin adresë në Prishtinë, duke shënuar kështu një moment historik në përfundimin e luftës çlirimtare.

“Nën intonimin e himnit kombëtar, gardistët kanë ngritur herët në mëngjes flamurin, i cili po valon lirshëm nga ballkoni i objektit ku është vendosur Komanda e Zonës Operative të Llapit”, thuhej në komunikatën e asaj dite.

Një nga vizitorët e parë në komandën e sapovendosur të UÇK-së në Prishtinë ishte veprimtari dhe simboli i rezistencës shqiptare, Adem Demaçi. Sipas komunikatës, ai u prit me nderime ushtarake nga komandanti i zonës, Rrustem Mustafa – Remi, dhe pjesëtarët e Gardës Kombëtare të Zonës Operative të Llapit.

Në takimin e zhvilluar mes tyre, Adem Demaçi kishte vlerësuar rolin historik të UÇK-së dhe luftës së saj çlirimtare, duke shprehur bindjen se luftëtarët e lirisë do të dinin t’i jepnin drejtim proceseve që do të pasonin pas luftës.

Po atë ditë, në Komandën e Zonës Operative të Llapit në Prishtinë kishin mbërritur edhe përfaqësues të NATO-s dhe të misionit të KFOR-it, me të cilët ishte diskutuar për bashkëpunimin dhe krijimin e kushteve për kthimin e sigurt të qytetarëve të zhvendosur gjatë luftës.

Komunikata theksonte se ky ishte vetëm fillimi i një procesi të gjatë rindërtimi dhe normalizimi, në të cilin UÇK-ja do të kishte rol të rëndësishëm në garantimin e sigurisë dhe stabilitetit.

Në fund të komunikatës së 11 qershorit 1999, Komanda e Zonës Operative të Llapit dhe komandanti Rrustem Mustafa përcillnin urimet për qytetarët, duke shprehur besimin se të gjithë të zhvendosurit do të ktheheshin së shpejti në Kosovën dhe Prishtinën e lirë për të filluar ndërtimin e një jete të re.

Sot, 27 vjet më vonë, 11 qershori mbetet një nga datat më të rëndësishme të historisë së Kosovës, dita kur në Prishtinën e lirë u ngrit flamuri kombëtar dhe kur Komanda e Zonës Operative të Llapit e vendosi selinë e saj në kryeqytet, duke vulosur fitoren e luftës për liri.