ZKA gjen një sërë projektesh që Komuna e Podujevës nuk i përfundoi me kohë

Zyra Kombëtare e Auditimit (ZKA) ka gjetur se në Komunën e Podujevës ka pasur vonesa në realizimin e kontratave duke tejkaluar afatet e përcaktuara sipas kontratës nga 18 ditë deri në 74 ditë.

ZKA ka theksuar se përkundër këtyre vonesave Komuna e Podujevës nuk kishte aplikuar penalti ndaj operatorëve ekonomikë.

Në raport thuhet se në kontratën për ‘furnizim me material për radiologji’ prej kërkesës për furnizim deri te pranimi i faturës kishte 18 vonesë.

30 ditë vonesë kishte pasur edhe në kontratën për ‘furnizim me kabinete’. Në këtë kontratë siç shpjegon ZKA, furnizimi do të duhej të bëhej pesë ditë nga nënshkrimi i saj mirëpo ajo kishte ndodhur me 30 ditë vonesë.

Në kontratën për ‘mirëmbajtën e lumit’ në vlerë 66 mijë euro punët janë dashur të përfundojnë deri më 07.04.2025 mirëpo raporti i pranimit ka treguar se shërbimet janë realizuar me 74 ditë vonesë.

Vonesa ka pasur edhe në kontratën furnizim me aparat fotografik i cili është dorëzuar me 21 ditë vonesë.

Zyra Kombëtare e Auditimit ka gjetur se edhe në kontratat për investime kapitale ka pasur vonesa në realizim të punimeve.

ZKA ka theksuar se në projektin “Renovimi i teatrit” në vlerë 219 mijë euro i cili ishte paraparë të përfundojë në muajin maj të vitit 2025 kishte qenë ende në realizim e sipër në shkurt të vitit 2026 me vetëm 79% të punimeve të realizuara.

Po ashtu, në projektin “Ndërtimi i shkollës së mesme ekonomike” në vlerë 566 mijë euro, i cili do të duhej të përfundonte më muajin korrik 2025 kishte qenë ende në punime e sipër në muajin shkurt të vitit 2025 kur është kryer auditimi nga ZKA, me vetëm 55% të punimeve të kryera.

Vonesa ka pasur edhe në projektin “Ndërtimi i tregut të qytetit” në vlerë 1 milionë e 440 mijë euro. Ky projekt do të duhej të përfundonte në muajin tetor 2025 mirëpo kishte qenë ende në punime e sipër në muajin shkurt 2026 me vetëm 27% të punimeve të realizuara.

ZKA ka theksuar se “kjo ka ndodhur si rezultat i dobësive në menaxhimin e kontratave, mangësive në projektet teknike dhe në monitorimin jo të mjaftueshëm gjatë zbatimit të tyre”.

“Kryetari duhet të sigurojë planifikimin dhe përgatitjen e projekteve teknike cilësore, monitorim më efektit të zbatimit të kontratave nga menaxherët përkatës si dhe buxhet të mjaftueshëm për të garantuar përmbushjen me kohë të obligimeve ndaj OE dhe realizimin e projekteve brenda afateve kontraktuale. Në të kundërtën aplikimin e penaltive në rastet e mosrespektimit të kushteve kontraktuale”- thuhet në raportin e ZKA-së.

Menaxhmenti i Komunës së Podujevës është pajtuar me këtë gjetje. Në letrën e konfirmimin përmes të cilës i pari i Podujevës e ka konfirmuar pranimin e draftit të raportit, ka thënë se nuk ka ndonjë koment për përmbajtjen e tij.

Raporti për pasqyrat financare për vitin 2025 për Komunën e Podujevës ka rezultuar me opinion të kualifikuar. Auditori jep opinion të kualifikuar kur Pasqyrat Financiare nuk janë në përputhje të plotë me standardet ndërkombëtare.

Raporti i ZKA-së përmban 11 rekomandime prej të cilave tri janë të reja, shtatë të përsëritura dhe një pjesërisht i përseritur.

Në raportin e vitit 2024, Komuna e Podujevës kishte pranuar 12 rekomandime. Deri në fund të procesit të auditimit për vitin 2025, Komuna e Podujevës ka zbatuar pesë rekomandime, një rekomandim ishte zbatuar pjesërisht kurse shtatë ishin përsëritur.