Mbyllet për publikun seanca ndaj dy të akuzuarve për vrasjen e dy zyrtarëve policorë në Podujevë

Prishtinë- Me kërkesë të mbrojtjes së të akuzuarit Alban Dezdari, është mbyllur për publikun seanca e së enjtes në Gjykatën Themelore në Prishtinë, në rastin ku Dezdari bashkë me Bedri Krasniqin, akuzohen për vrasjen e dy zyrtarëve policorë në vitin 2004 në Podujevë.

Mbrojtësi i Dezdarit, avokati Florent Latifaj, ka kërkuar mbylljen e seancës për publikun, me arsyetimin se gjatë deklarimit të të mbrojturit të tij, do të përmenden emra të politikanëve dhe heronjve kombëtar, raporton “Betimi për Drejtësi“.

Gjykatësi Arben Hoti pyeti të akuzuarin Dezdari se meqenëse kanë kërkuar që seanca të mbyllet, a nënkupton kjo që gjatë paraqitjes së mbrojtjes mund të rrezikohet jeta e tij apo e familjarëve të tij.

“Për mua nuk mund të rrezikohet, por familja ime mund të rrezikohet”, tha i akuzuari Dezdari.

Në anën tjetër, i akuzuari Krasniqi tha se për të nuk është problem edhe nëse seanca duhet të jetë publike.

Më pas, trupi gjykues pas konsultimit, mori vendim që të mbyllet seanca për publikun, deri në përfundim të dhënies së mbrojtjes së të akuzuarit Dezdari.