Gruaja në Podujevë detyrohet të largohet prej shtëpisë, shkak dhuna e vazhdueshme nga vjehrri

Rastet e dhunës në familje janë në rritje çdo ditë e më shumë. Zakonisht viktima janë gratë, të cilat përjetojnë dhunë psikike e fizike jo vetëm nga bashkëshortët, por edhe nga pjesëtarët tjerë të familjes, raporton Gazeta Sinjali.

Burimet nga Prokuroria kanë bërë me dije se një rast i tillë është raportuar gjatë ditës së djeshme në Podujevë, ku një 26-vjeçare e ka denoncuar në Polici babain e bashkëshortit, vjehrrin e saj.

Bazuar në dëshminë e viktimës të dhënë para hetuesve policorë, vjehrri i saj po ushtron dhunë sistematike ndaj saj, duke i bërë presion, e deri në atë pikë sa e ka detyruar të largohet nga shtëpia pasi nuk mund ta përballojë më shumë dhunën psikike.

Për pasojë, ajo ka vendosur që të kërkojë ndihmë, duke e raportuar të dyshuarin në Polici, me ç’rast ka rrëfyer për dhunën që ka përjetuar në shtëpinë e burrit.

Si rezultat i raportimit, me urdhër të Prokurorit të Shtetit kanë nisur hetimet për dhunë në familje ndaj të dyshuarit, kurse gruaja është dërguar te prindërit e saj bashkë me fëmijët, pasi aty ndihet më e sigurt.