“Nuk e dini kon e keni nalë”/ 60-vjeçari në Podujevë kërcënon policët që e ndalën, tenton t’i kafshojë me dhëmbë

Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë kërcënimet verbale eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën, raporton Gazeta Sinjali.

E së fundi Prokuroria ka nisur hetimet ndaj një 60-vjeçari, pasi i njëjti dyshohet se në gjendje të dehur ka kanosur dhe ka tentuar të sulmojë fizikisht zyrtarët policorë në Gllamnik të Podujevës.

Gjithçka ka ndodhur rreth orës 19:35 ku zyrtari policor ishte rrezikuar nga i dyshuari teksa po voziste veturën zyrtare të Policisë. Në pamundësi për ta ndalur vetë, ai ka kërkuar ndihmë nga Njësia e Reagimit të Shpejtë, të cilët e kanë ndalur personin e dyshuar dhe tek i njëjti kanë gjetur një sprej OC i cili është konfiskuar.

60-vjeçari ka qenë agresiv dhe i dhunshëm gjithë kohës, duke tentuar që t’i kafshojë me dhëmbë dhe t’i godas me kokë zyrtarët policorë. Ai po ashtu i kishte kanosur ata me fjalët ‘nuk e dini kon e keni nalë’.

Ai është arrestuar menjëherë dhe është shoqëruar në stacion policor për intervistim, ku i është nënshtruar edhe testit të alkoolit, ku ka rezultuar se është në gjendje të dehur.

Me vendim të prokurorit, atij i është caktuar masa e ndalimit në kohëzgjatje prej 48 orësh dhe i njëjti do të hetohet nën dyshimet për kryerjen e veprës penale ‘Armëmbajtje pa leje’ dhe ‘Sulm ndaj personit zyrtar’.