U shënua Dita Botërore e Bletës në Herticë të Podujevës

Komuna e Podujevës në bashkëpunim me Shoqatën e Bletarëve “Llapi” kanë shënuar 20 majin – Ditën Botërore të Bletës me një manifestim me bletarë llapjanë.

Në këtë aktivitet morën pjesë nënkryetarja e Komunës, Marigona Lahu, dhe Drejtori i Drejtorisë së Bujqësisë, Pylltarisë dhe Zhvillimit Rural, Vigan Salihu.

Para të pranishmëve folën nënkryetarja Lahu dhe kryetari i shoqatës së bletarëve “Llapi”, Raif Muqolli.

Nënkryetarja Lahu tha: “Ndjehem e lumtur që jam në mesin e bletarëve të vyeshëm llapjanë, për ta shprehur gatishmërinë e ekzekutivit lokal për mbështetje të vazhdueshme për sektorin e bletarisë, sektor i cili për çdo vit është duke shtuar numrin e shoqërive të bletëve si dhe numrin e fermerëve që po merren me këtë veprimtari, sa të rëndësishme në prodhim, po aq edhe specifike në kultivim.

Gjatë takimeve dhe vizitave bletarëve llapjanë, jemi njoftuar me vështirësitë dhe sfidat me të cilat ata përballen, por edhe me suksesin që ata dita ditës po e shënojnë, dhe janë pikërisht këta shtytës kryesor për zhvillim të qëndrueshëm ekonomik.

Në angazhimin tonë si qeverisje e re lokale, kemi zhvilluar takime me instanca qendrore dhe me partnerë ndërkombëtarë, për të siguruar mbështetje edhe më të madhe për ju, përtej planifikimeve tona buxhetore, sepse siç e dini edhe ju ky buxhet nuk është as për së afërmi i mjaftueshëm për kërkesat dhe nevojat tuaja, sidomos pas një viti të vështirë që kaluam të gjithë, si pasojë e pandemisë dhe një viti të vështirë që kaluat ju, si pasojë e kushteve jo të favorshme klimatike”.

Ndërsa kryetari i shoqatës së bletarëve Muqolli foli për rëndësinë e bletës në ekosistem si burim jete për jetën bimore dhe njerëzore, poashtu para të pranishmëve ai ndau disa statistika me rëndësi. Në botë janë mbi 56 milionë zgjoje të bletës, ndërsa vetëm në Evropë janë rreth 16 milionë zgjoje dhe rreth 600 mijë bletarë kultivues të rregullt.

Ky aktivitet u përmbyll me një recitim nga nxënësja Ana Rashiti dedikuar bletës dhe me një vallëzim nga klubi i vallëzimit “Shqiponja e Llapit”.