ARKIVË: Këto ishin shkollat e para fillore në Podujevë gjatë viteve 1940-1941!

Mbështetur në të dhënat e së kaluarës së kësaj treve shihet se që nga viti shkollor 1940/1941 shkolla fillore në këtë anë punonin në Podujevë, Sibovc, Dumnicë, Lupç, Bajçinë, Majanc, Turiçicë, Prapashticë, Orllan, Koliq, Sfeçël, Kërpimeh, Herticë etj.

Viti 1940-1941 ishte pikënisja e fillimit të organizimit të shkollave në komunën e Podujevës, ndërsa ato u zhvilluan përgjatë Luftës së Dytë Botërore, kryesisht gjatë viteve 1941-1944.

Shkolla e Podujevës e filloi punën në shtator 1941 dhe mbante emrin “Skënderbeg” dhe në fillim kishte 150 nxënës, ndërsa me shtimin e paraleleve u shtuan edhe nxënësit. Në këtë shkollë punonin mësuesit: Ismail Thaçi, Muhamet Çaki nga Shkodra, Emin Ismaili, Isak Nika, Mustafë Berberi, Hasan Bilalli, Adem Guta, Sylë Hysi nga Prizreni.

Shkolla e Dumnicës mbante emrin “Sami Frashëri”, ishte katërklasëshe dhe kishte 70 nxënës. Në këtë shkollë punonin mësuesit: Halit Vërshefci dhe Maliq Llausha.

Shkolla e Kërpimehut mbante emrin “Azem Bejta”, ishte katërklasëshe dhe kishte 80 nxënës. Në këtë shkollë punën e mësuesit e kryente Ibrahim Thaçi.

Shkolla e Sibovcit ishtë më e madhe dhe kishte mjaftë nxënës. Në të vijonin mësimin fëqmijët nga  Burica, Konushefci, Penuha, Gllamniku dhe Dumoshi. Mësuesit e kësaj shkolle ishin Ramadan Deda, Abdurrahman Gërguri dhe Hashim Obrazhda.

Shkolla e Lluzhanit e mbante emrin “Besa”, veç fëmijëve, mësimin në këtë shkollë e vijonin edhe të rriturit vullnetarë.

Shkolla e Sfeqlës mbante emrin “Bajram Curri”, ndërsa detyrën e mësuesit e kryente Ramë Shajkofci i cili përpos mësimit fetar jepte të gjitha lëndët e parapara me program.

Shkolla e Orlanit mbante emrin “Avni Rrustemi” dhe kishte 80 nxënës. Detyrën e mësuesit e kryente hoxha Idriz Orllani

Në shkollë e Koliqit sikurse edhe në të dy shkollat paraprake mësimi kishte bazë fetare dhe mësues ishte Halit Majkofci. Veçoria e këtij mësimi në këtë shkollë mbizotëroi tepër që mësimi të merrte karakter kombëtar sa u detyrua të intervenonte edhe prefektura.

Karakter të theksuar fetar pati edhe mësimi që zhvillohej në shkollën e Herticës, ku detyrën e mësuesit e kryente mësuese me mbiemrin Sekiraça.

Gjatë luftës së Dytë Botërore edhe në fshatin Pollatë qe paraparë të hapej një shkollë fillore. Mirëpo, pasi fshati u sulmua disa herë nga çetnikët dhe grumbullimi i fëmijëve ishte me rrezik të madh. Shkolla e këtij fshatin në këtë periudhë nuk punoi. /PodujevaPRESS/

© PodujevaPRESS. Të gjitha të drejtat janë të rezervuara