Sulmohet roja i pyllit në Podujevë

Dje në fshatin Kërpimeh të Podujevës është sulmuar me motosharrë roja i pyllit nga një i dyshuar, me ç’rast ka lënduar gishtin e dorës, shkruan Gazeta Sinjali.

E gjithë ngjarja, Sinjali merr vesh se filloi derisa roja i pyllit ishte duke fotografuar vendin e ngjarjes, kur u sulmua nga i dyshuari. Për shkak të lëndimeve të rënda, viktima fillimisht ka marrë trajtim mjekësor në Podujevë, e më pas është dërguar në Qendrën Klinike Universitare të Kosovës për tretman të mëtutjeshëm.

Burimet e Sinjalit brenda Policisë kanë bërë me dije se lidhur me këtë rast nuk është intervistuar i dyshuari, pasi që i njëjti nuk është paraqitur në Polici por vetëm përmes telefonit ka dhënë një deklaratë.

Çka tha i dyshuari pas sulmit ndaj rojës së pyllit?

I dyshuari përmes telefonit ka deklaruar se diku në pyll, në afërsi të kufirit ka humbur fëmija i tij i mitur.

Por këtë deklaratë e ka demantuar një i afërm i të dyshuarit, i cili e ka lajmëruar Policinë dhe ka njoftuar se fëmija i të dyshuarit është në fshat, të shtëpia e tij dhe është mirë.

I dyshuari sipas burimeve të Sinjalit ende nuk është paraqitur në Polici dhe në telefonatën e tij nuk ka treguar për vendndodhjen.

Ky rast në Polici është hapur si  “lëndim i rëndë trupor dhe lajmërim apo kallëzim i rremë”.