Flet personi që pretendon se u sulmua fizikisht nga kryetari i Podujevës, Shpejtim Bulliqi

Pak minuta më parë IndeksOnline ka raportuar se një qytetar u sulmua fizikisht nga kryetari i Komunës së Podujevës Shpejtim Bulliqi.

IndeksOnline ka kontaktuar Ramadan Zymerin i cili është shef i transportit në Komunën e Podujevës, po pretendon se është sulmuar fizikisht nga Bulliqi, teksa ishte në Qendër të Mjekësisë Kryesore Familjare, në Podujevë.

Zymeri ka rrëfyer se si kishte shkuar në QKMF dhe si ndodhi e gjithë situata.

Sipas tij Bulliqi kishte filluar ta pyeste pse nuk je në vend të punës.

“Është e vërtetë që ka ndodhur sulmi. E  kam nënën të sëmurë i ka dy këmbët e  amputume dhe gjithmonë shkojmë  me marrë një ekip të mjekëve me ba pastrimin dhe ndërrimin e asaj katetes a qa është. Ai ish kanë për vizitë pune dhe kur më ka pa, mu ka drejtu, tha çka ke lyp ti këtu, çka je sill këndej, pse nuk je në punë. Kur unë deshta t’i tregoja se pse jam këtu, i tregova që kam ardh me marrë  ekip mjekësor për nanën, në mënyrë të butë dhe të qetë, aty ka qenë prezent drejtori i QKMF-së edhe ka qenë zëvendësi i tij Bajram Bajgora, i cili gjithmonë më ka dërguar autoambulancën”, tregon Zymeri për IndeksOnline.

Ai tregon se si donte të vazhdonte t’i rrëfënte Bulliqit se kishte ardhur para pauzës që ishte në orën 9:00, por prapë Bulliqi e kishte pyetur se pse nuk ishte në vendin e tij të punës.

Madje ai tregon se si e kishte kërcënuar Bulliqi dhe momentin që e kishte sulmuar fizikisht.

“Më tha pse s’je në punë prapë. I thash o unë prej punës erdha dhe sipas vendimit të IKSHPK-së unë i kam mbi 60 vjet, unë jam me orar të reduktuar, kur ka nevojë më thërrasin. Dhe veç  ma ka ngjit prej krahu tha hajde qenkej, u nda prej ekipit. Më tha: A e din se krejt këtë gabzherr ta nxjerri me qeta gishta, i ka zgjatë gishtat dhe më ka kërcënuar dhe më ka sulmuar fizikisht”, tha Zymeri që në Komunën e Podujevës është shef i transportit.

Ai ka treguar se a kanë pasur përplajse më herët me Bulliqin. Ndërsa tha se motivet e këtij sulmi janë politike.

“Janë edhe provokimet që janë bërë më herët, por unë i kam marrë jo që janë me qëllim të caktuar se unë kam punuar edhe më herët më të, mirëpo  ai e paska pas krejt me qëllim të caktuar dhe e shfrytëzoi rastin aty dhe më sulmoi. Këto janë motive jo zyrtare. Unë zyrtarisht dola, unë e lash ekipin tue punue në zyrë, por edhe gjithnjë provokime ka pasur përpara, kësaj here mendoj ma merr mendja që është politike, kaloi në personale”, theksoi ai.

Nga ana tjetër Policia e Kosovës për IndeksOnline ka bërë të ditur se në orën 9:30 një person ka denoncuar rastin në polici dhe se aktualisht janë duke u trajtuar pretendimet e paraqitura nga denoncuesi dhe me qëllim të zbardhjes së plotë të  të gjitha rrethanave që karakterizojnë ngjarjen veprimet policore po ndërmerren në koordinim me prokurorin e shtetit