8 infermierë pa kontrata të rregullta, ankohet Sindikata e QKMF-së në Podujevë

Me kontratë mbi vepër kanë mbetur qe disa vjet 8 infermiere të Qendrës Kryesore të Mjekësisë Familjare në Podujevë.

Derisa ato nuk kanë qenë të gatshme të prononcohen nga frika e hakmarrjes, problematika është ngritur nga Sindikata e këtij institucioni, që theksojnë se punëtoret në fjalë, po diskriminohen si në pagë, po ashtu edhe në benefite të tjera, raporton KOHA.

“Çka është më e keqja, këto punëtore janë diskriminuar, se Ligji i punës i garanton çdo punëtori pushimin vjetor, 20 ditë pune në vit me Ligj pune. Këto nuk gëzojnë pushimin vjetor, nuk marrin kujdestari, nuk u paguhet ndërrimi i natës që është me Ligj të punës, nuk u paguhet vikendi që me Ligj të punës është 50 për qind. Janë të diskriminuara në çdo aspekt”, ka thënë Sheqir Maliqi, kryetar i Sindikatës në QKMF-në e Podujevës.

Sipas kryetarit të Sindikatës, Sheqir Maliqi, thotë se Ligji për shërbyesit civilë e parasheh që një punëtor nuk mund të angazhohet me kontratë mbi vepër më shumë se 120 ditë brenda një viti, e në situatë të ngjashme, deri para pak kohësh, në situatë të ngjashme ishin 10 punëtorë, por 2 prej tyre tashmë kanë nënshkruar kontrata të rregullta.

KOHA ka kontaktuar edhe ushtruesin e detyrës së drejtorit të QKMF-së, Bejtush Jashari, dhe kryeinfermieren e këtij institucioni, Ganimete Haxhiu, por asnjëri nuk kanë qenë në gjendje të deklarohen.

Në anën tjetër, zyrtarët komunalë të Podujevës kanë thënë se me qëllim të ofrimit të shërbimeve më të mira shëndetësore, ata në vazhdimësi kanë ndërtuar objekte shëndetësore. Kjo, sipas zëdhënësit Bujar Gimolli, ka determinuar edhe në rritjen e shërbimeve dhe rritjen e stafit.

“Ne disa herë kemi kërkuar nga instancat qeveritare që të na mundësohet pranimi i stafit shtesë, nuk kemi hasur në mirëkuptim, në këtë formë e vetmja mënyrë për t’i realizuar këto shërbime, ka qenë përmes angazhimit të punëtorëve përmes kontratës mbi vepër. Ne këtë herë i kemi vazhduar për herën e fundit, sepse shpresojmë dhe besojmë që ligji për zyrtarët publikë, i cili është miratuar përgjysmë, shpresojmë që të plotësohet me aktet e tjera nënligjore në mënyrë që ta zgjidhë njëherë e përgjithmonë çështjen e punësimit të personave me kontratë mbi vepër”, ka thënë ai.

E përveç problemeve me kontrata mbi vepër, kryesindikalisti i QKMF-së, Sheqir Maliqi, thotë se telashe po kanë edhe mospagesën e 162 mijë eurove nga ana e Komunës për pagat jubilare.

Ai thotë se janë 189 punëtorë të cilëve u takojnë nga 1, 2 e 3 paga, për të cilat ekziston edhe një vendim i formës së prerë të Inspektoratit të Punës, por që Komuna e Podujevës ka refuzuar ta zbatojë dhe lënda ka shkuar në gjykatë.

Ndërkohë, zëdhënësi Gimolli thotë se në kohën kur është nënshkruar Kontrata kolektive ndërmjet ish-ministrit Uran Ismaili dhe Federatës sindikale, nuk ka pasur zotim të mjeteve.

Ai thotë se është e pamundshme të bëhen të gjitha këto pagesa përnjëherë, por sipas tij, këtë do ta bëjnë viteve në vazhdim pasi të ndajnë një fond për këtë çështje.