PODUJEVË: Drejtoria e Arsimit njofton se katër mësimdhënës dhe tre nxënës kanë rezultuar pozitivë me Covid-19.

KKSB shqyrtoi gjendjen e sigurisë dhe situatën me menaxhimin e pandemisë Covid-19

Këshilli Komunal për Siguri në Bashkësi i Komunës së Podujevës (KKSB) ka mbajtur mbledhjen e rregullt në të cilën ka analizuar gjendjen e sigurisë në komunë, situatën me pandeminë, sigurinë në shkolla dhe në komunikacion.

Këshilli Komunal për Siguri në Bashkësi në mbledhjen e sotme, të cilën e kryesoi Nënkryetari Nexhmi Rudari, ka shqyrtuar gjendjen e sigurisë në komunë, situatën aktuale dhe menaxhimin e pandemisë COVID-19, sigurinë në shkolla dhe gjendjen e sigurisë në komunikacion.

Drejtori i Arsimit, Agim Blakçori, tha se procesi mësimor në kushte pandemie është duke u zhvilluar sipas tre skenarëve – modaliteteve të rekomanduara nga Ministria e Arsimit.

Ai tha se deri më tani gjithsej katër mësimdhënës dhe tre nxënës kanë rezultuar pozitivë me Covid-19.

Sipas drejtorit Blakçori, gjendja e sigurisë në shkolla është e mirë.