Kuvendi i Komunës së Podujevës, mbajti mbledhjen e rregullt

Kuvendi i Komunës së Podujevës, ka mbajtur mbledhjen e rregullt të cilën e kryesoi Mehmet Gashi- kryesues i Kuvendit, në të cilën ishte i pranishëm edhe nënkryetari i Komunës, Nexhmi Rudari dhe drejtorët e ekzekutivit të Komunës, thuhet në njoftimin e zyrës për Marrëdhënie me Publikun dhe Informim, transmeton PodujevaPRESS.

Në fillim të mbledhjes së sotme, shefi i Grupit të Këshilltarëve të PDK-së, Rafet Llapashtica, kërkoi që të futet në rend të ditës edhe një deklaratë në përkrahje për ish-Kryeministrin e Kosovës, kryetarit të AAK-së, Ramush Haradinaj, i cili po mbahet në Francë në bazë të një fletarresti nga Serbia. Këshilltari Llapashtica gjithashtu kërkoi që të futet në rend të ditës edhe plotësimi i Komitetit për Komunitete edhe me një anëtar nga grupi i këshilltarëve të PDK-së.

Kuvendi miratoi me shumicë votash rendin e ditës, sipas rekomandimit të Komitetit për Politikë dhe Financa dhe me plotësimet e propozuara nga këshilltari Llapashtica.

Me sugjerimin e kryesuesit të Kuvendit, Mehmet Gashi, Kuvendi vendosi që paraprakisht të kërkojë nga Ministria e Administrimit të Pushtetit Lokal një vlerësim ligjor lidhur me ngritjen e Komisionit për shqyrtimin e ankesave lidhur me emërtimin e disa rrugëve në territorin e Komunës së Podujevës.

Drejtori i Drejtorisë së Arsimit, Avni Maloku, këshilltarëve komunalë ua ka prezantuar një informatë për përfundimin e suksesit të nxënësve në gjysmëvjetorin e parë dhe fillimin e gjysmëvjetorit të dytë të vitit shkollor 2016 – 2017.

Lidhur me këtë informatë diskutuan Fidan Rekaliu (LDK), Rafet Llapashtica (PDK), Bahri Selimi (VV), Avni Ajeti, Kadri Avdiu Grupi+, Lutfi Rexhepi (PDK), Kadrije Mulolli (LDK). Në shumicën nga diskutimet u kërkua që të ngritet cilësia në arsim, ku u përmend rezultati i dobët në testin PISA. U bënë vërejtje edhe për menaxhim jo të mirë, si dhe u kërkua përmirësim i infrastrukturës shkollore. Lidhur me këtë çështje, nënkryetari i Komunës, Nexhmi Rudari, tha se gjendja në arsim në përgjithësi nuk është e mirë në nivel vendi.

Drejtori i Drejtorisë së Shërbimeve Publike, Mbrojtje dhe Shpëtim, Faik Muçiqi, prezantoi raportin për zbatimin e diskutimit publik të Propozim Planit lokal për menaxhimin e mbeturinave në Komunën e Podujevës për periudhën 2017 – 2022.
Pas diskutimeve dhe propozimeve lidhur me këtë pikë të rendit të ditës, Kuvendi me shumicë votash miratoi Planin lokal për menaxhimin e mbeturinave në Komunën e Podujevës për periudhën 2017 – 2022.

Kuvendi miratoi edhe vendimin për ngritjen dy Komiteteve Konsultative (Komitetit për Zhvillim Ekonomik dhe Komitetin për Planifikim Urban dhe Mbrojtje të Mjedisit); vendimin për ngritja e panelit përzgjedhës për propozimin e anëtarëve të Komiteteve Konsultative; vendimin për publikimin e konkursit për anëtarësim në Komitete Konsultative.

Gjithashtu u miratua vendimi për plotësimin e Komisionit vlerësues për dhënien e pronave të paluajtshme të Komunës në shfrytëzim.

Në mbledhjen e sotme Kuvendi miratoi edhe Vendimin për dhënien në shfrytëzim afatgjatë të paluajtshmërisë në pronësi të Komunës, Ministrisë së Punës dhe Mirëqenies Sociale, për ndërtimin e objektit të Qendrës së Aftësimeve Profesionale.

Kuvendi gjithashtu miratoi vendimin që këshilltari nga radhët e PDK-së, Sabri Hamiti, të jetë anëtar i Komitetit për Komunitete.

Me propozimin e shefit të grupit të këshilltarëve të PDK-së, Rafet Llapashtica, Kuvendi miratoi edhe një deklaratë në mbështetje të ish-Kryeministrit të Kosovës, kryetarit të AAK-së, Ramush Haradinajt, i cili është ndaluar nga autoritet franceze në bazë të një fletarresti të lëshuar nga Serbia, përfundon njoftimi i zyres për Marrëdhënie me Publikun dhe Informim. /PodujevaPRESS/