Bulliqi për Demarkacionin: Ne e bëmë punën tonë, s`kemi më kompetenca

Komisioni për shënjimin e vijës kufitare me Malin e Zi nuk do të merret më me çështjen e Demarkacionit. Anëtarët e këtij komisioni e kanë përfunduar punën e tyre dhe se si do të veprohet tutje, nuk është më në kompetencën e tyre.

Në një prononcim për “Indeksonline”, kryetari i këtij komisioni, Shpejtim Bulliqi ka thënë se puna që është dashur ta kryejë komisioni ka përfunduar dhe se çka do të ndodhë mëtej, nuk i takon atij ta komentojë.

“Komisioni ynë e ka mbaruar punën e vet në bazë të një vlerësimi që i është bë punës së komisionit. Kemi dalë me të gjeturat dhe tash më kjo nuk është kompetencë e komisionit. Këto janë çështje tjera që nuk hynë në domenin tonë. Çdo gjë që është arritë me u hulumtu e me u gjetë është shkruar në raport. Kjo ka kaluar në Qeveri, pastaj raporti i është dërguar deputetëve dhe më tutje nuk është kompetencë e jona se çka apo si do të veprohet tutje”, ka deklaruar ai.

Ndryshe, në mbledhjen e fundit që u mbajt nga Kryesia e Kuvendit, nuk është arritur që Demarkacioni të kalojë tek deputetët për votim për shkak të mungesës së konsenzusit. Ndërsa, një ditë para mbledhjes së Kryesisë ishin takuar në shtëpinë e Behgjet Pacollit pothuajse i gjithë kabineti qeveritar, po ashtu edhe presidenti Hashim Thaçi.

Sot, në Kosovë ishte paraparë të vinte për vizitë kryeministri i Malit të Zi, Dushko Markoviq por i njëjti ka anuluar fluturimin pasi u shfaqën probleme me mjegullën, shkruan Indeksonline. Markoviq kishte planifikuar të takohej me kryeministrin Haradinaj. Nuk është bërë e ditur se kur do ta zhvillojë kryeministri malazez këtë takim në Prishtinë./Indeksonline/