Albin Kurti ia hedh fajin LDK’së pse ‘iku’ AKR’ja

I nominuari për kryeministër nga VV’ja, Albin Kurti, është deklaruar pas nënshkrimit të koalicionit, duke hedhur fajet së pari tek LDK’ja e pastaj tek AKR’ja.

Kurti thotë se pasiviteti i LDK’së dhe apetitet, duke e lënë të kuptohet se e ka fjalën për Pacollin, e humbën një shans tjetër, shkruan gazetametro.net. Madje Kurti ka thënë se pasiviteti është gabimi më i madh, duke e lënë LDK’në si fajtorin më të madh për ikjen e AKR’së.

‘Apetitet nga njëra anë dhe pasiviteti nga krahu tjetër, e humbën edhe një shans shtesë pas atij të VLAN-it. Kot je pasiv që të mos bësh gabime, sepse pasiviteti është gabimi më i madh’, ka thënë Kurti.

Por Kurti thotë se dje u shpërbë edhe një koalicion tjetër, përveç atij LAA. Ai e ka fjalën për PAN’in, pasi sipas Kurtit marrëveshjen me Pacollin e bënë tre kryetarët e partive dhe jo kryetari i PAN’it.

Gjithashtu, deputeti më i votuar i kësaj legjislature, beson se me nënshkrimin e këtij koalicioni, konstituimi i Kuvendit dhe formimi i qeverrisë, siç thotë ai, ‘është lënë në dorë të Vucic’it’.

‘Pas marrëveshjes së mbrëmshme, konstituimi i Kuvendit të Kosovës dhe formimi i qeverisë së re është lënë në dorë të Vuçiqit’, ka thënë ai.

Ndryshe, Albin Kurti deri mbrëmë shpresonte në dështimin e PAN’it për të siguruar numrat, për t’u hapur, siç besonte ai, rruga për ta krijuar ai qeverinë bashkë me LAA’në.