Opozita me leksione ndaj qeverisë: Veproni kështu ndaj Serbisë

Nisja e një treni “rus” nga Beogradi me destinacion Mitrovicën, padyshim se shfaqi shumë pakënaqësi por edhe shqetësim tek qytetarët dhe institucionet e Kosovës, shkruan Indeksonline.

Por me vendim të marrë nga organet e rendit, ai tren u vendos që të kthehej në Beograd ende pa arritur në destinacionin e nisur.

Për më tepër sipas deputetëve të opozitës, ky tren është vazhdimësi e provokimeve të Serbisë që bëhen pothuajse gjatë gjithë kohës.

Deputeti nga radhët e Lëvizjes Vetëvendosje, Rexhep Selimi ka thënë për Indeksonline se Serbia do të vazhdojë të veprojë kundër Pavarësisë së Kosovës, me të gjitha mjetet që i ka.

“Ata nuk ndalen vetë, duhet t’i ndalim ne. Serbia nuk e ndal sulmin ndaj Kosovës përderisa vetë Kosova (Qeveria), po ia jep në dorë mjetet me të cilat po na e lufton. Negociatat janë mjeti kryesor me të cilat Serbia po na e lufton”, ka thënë Selimi.

Sipas këtij të fundit, rreziku nga eskalimi i situatës nuk ka kaluar ende.

“Serbët po inkurajohen nga Qeveria e Beogradit dhe nga brishtësia e institucioneve të Kosovës. Veprimi policor po del të jetë efektiv”, ka shtuar Selimi.

Ky i fundit ka bërë të ditur se Qeveria e Kosovës nuk duhet të ndalet siç u ndal në vitin 2011-të.

“Qeveria e Kosovës nuk duhet të ndalet tashmë siç u ndal në 2011-tën, kur serbët patën ngritur barrikada në veri pas veprimit policor në pikat 1 dhe 31”, ka përfunduar Selimi.

Kurse në një prononcim për Indeksonline, deputeti nga radhët e Aleancës për Ardhmërinë e Kosovës, Lahi Brahimaj ka theksuar se çështja e trenit të nisur për Mitrovicë, është vazhdim i një politike të së kaluarës së Serbisë.

“Pra e thënë ndryshe e shkurtë, për Serbinë vetëm njerëzit, vitet dhe shekulli ka ndërruar mentaliteti është i njëjtë në kuptimin e tendencës për të invaduar e sunduar rajonin e sidomos Kosovën”, ka thënë Brahimaj.

Sipas këtij të fundit këto provokime, arrestime e gjithçka që po tenton të bëjë Serbia në drejtim të Kosovës, do të mund të ndaloheshin nëse do të kishte seriozitet dhe reciprocitet nga Qeveria e Kosovës.

“Serbia veç gjuhën e reciprocitetit e njehë, ndryshe sa për demokratizim të saj, është po e njëjta Serbi ajo e kohës së Millosheviçit, sepse sot në krye të këtij shteti janë shërbëtorët e dikurshëm të kasapit të Ballkanit, prandaj s’ka si të jetë e mirë përballë shtetit tonë.Ne me mungesën e ushtrisë, jemi të rrezikuar çdo ditë nga ndonjë dyndje Serbisë në veri të Mitrovicës. Mbrëmë u pa shumë kjartë se nuk mungon guximi i djemve dhe vajzave të Policisë së Kosovës për të ruajtur sovranitetin e Kosovës, por mungon vullneti politik e institucional. Reagimi i institucioneve të vendit tonë ishte shumë i vakët dhe i plogësht dhe mbi të gjitha i vonuar. Falë zotit qe u aktivizuan edhe KFOR-i dhe Serbia e kuptoj se nuk do të ishte veprim i mençur “pushtimi” i Kosovës përmes një treni ilegal e me mesazhe nacionaliste dhe e ndali në pjesën e vet, sepse do të mund të ndodhte edhe esklalim i situatës”, ka shtuar Brahimaj.

Sipas këtij të fundit  Serbia për t’u ndalur e kupton vetëm gjuhën e njëjtë të veprimit.

“Nuk duhet t’i jepet shansi që të përfitojë në dialog, i duhet rikujtuar në vazhdimësi se Kosovës i ka borxh shumë dhe më mirë se të vazhdojë me ide të njëjta sikur para dhe gjatë luftës në raport me neve, duhet të tregojë ku i ka zhdukë edhe mbi 1500 qytetarë të Kosovës, kur do ta kthejë fondin pensional të Kosovës që e ka grabitë gjatë luftës, artefaktet e shumta të Kosovës, dëmshpërblimet për krejt shkatërrimet që ia ka shkaktuar këtij vendi, të kërkojë falje dhe të pranojë se ishte Serbia që i shkaktojë të gjitha vuajtjet në këtë pjesë të Evropës dhe të shohë përpara e jo të rikthehet mbrapa sepse ashtu s’do t’i binte mirë askujt. Qeveria jonë, duhet t’ia bëjë me dije se Kosova ka zot shtëpie”.ka përfunduar Brahimaj.

Haxhi Shala, deputet nga radhët e Nismës për Kosovën, ka potencuar për Indeksonline se Serbia asnjëherë nuk ka të ndalur në provokimin e shtetit të Kosovës.

“Serbia asnjëherë nuk ka të ndalur në provokimin e shteti të Kosovës por ne duhet të jemi të gatshëm  që çdoherë t’i kundërvihemi shteti të Serbisë dhe të mos e lëmë që të provokojë siç ishte rasti i trenit në vendin ku janë duke funksionuar struktura paralele e që gjithmonë mundohet të provokojë shtetin e Kosovës”, ka thënë Shala.

Sipas Shalës,  Qeveria e  Kosovës duhet që të bisedojë dhe të gjejë modelin e ndërprerjes së bisedimeve me Serbinë.

“Po ashtu duhet t’i dërgohet një shkrim Brukselit me këto provokime dhe për shkak të këtyre provokimeve duhet që këto bisedime të ndërpriten menjëherë.

Dje ka qenë shumë e mundshme që gjendja të eskalojë e që besoj se deri në eskalim të situatës  nuk do të ishin të interesuar as Serbia e as Kosova”, ka përfunduar Haxhiu.