Vdes mamia llapjane Sanije Topanica, iu ndihmoi grave në lindje gjatë luftës
CIA i gjen rusët që ndikuan në zgjedhjet presidenciale të SHBA-së
Mediat amerikane kanë raportuar se agjencitë e inteligjencës në SHBA i kanë identifikuar rusët që thuhet se ia kanë dhënë faqes së internetit Wikileaks e-mailat e hakuar me qëllim që të ndikohen zgjedhjet presidenciale amerikane të mbajtura në nëntor.
Gazeta “The Washington Post” dhe agjencia e lajmeve Reuters kanë raportuar se CIA ka identifikuar zyrtarët rusë që ia kanë dhënë Wikileaks materialet e vjedhura nga Komiteti Kombëtar i Demokratëve dhe liderëve të kësaj partie, me direktiva të presidentit rus, Vladimir Putin por përmes palëve të treta, shkruan sot Gazeta Express.
Reuters shkruan se të gjeturat përmbajnë dokumente me informacione sekrete që agjencitë e inteligjencës ia kanë dhënë presidentit Barack Obama, më 5 janar dhe të cilat pritet t’i jepen gjatë ditës së sotme edhe presidentit të zgjedhur, Donald Trump.
Të gjeturat janë të rëndësishme sepse themeluesi i Wikileaks, Julian Assange e ka mohuar se emailat e vjedhur i ka marrë nga rusët, ndërsa Trump dje gjatë ditës e ka përsëritur mohimin e Assangit se rusët janë të përfshirë.
Reuters shkruan se materiali i vjedhur si pasojë e sulmeve kibernetike, në disa raste “shkonte në rrugë përqark” nga GRU, agjencia e inteligjencës së ushtrisë ruse deri te Wikileaks, në përpjekje që ta vështirësojnë gjetjen e origjinës se nga e kanë burimin materialet, një praktikë kjo e zakonshme që e përdorin të gjitha agjencitë e spiunimit.
Këto mënyra të dorëzimit ia kanë mundësuar Wikileaks të thonë qeveria ruse nuk është burimi i materialeve të publikuara në faqen e saj të internetit, shkruan më tej Reuters.
