90 persona të arrestuar në Podujevë që nga shfaqja e pandemisë në Kosovë

Që nga 13 marsi, kur në Republikën e Kosovës u paraqitën rastet e para me virusin Covid-19, e deri më tani, Policia e Kosovës (PK) ka arrestuar raportuar për 46 raste në Komunën e Podujevës, të cilat kanë rezultuar me arrestimin e 90 personave.

Të gjithë personat e arrestuar dyshohet se kanë kryer veprën penale nga neni 250 të Kodit Penal të Republikës së Kosovës (KPRK), “mosveprimi sipas dispozitave shëndetësore gjatë epidemisë”.

Këto të dhëna, për “Betimi për Drejtësi”, i ka bërë të ditur PK.

“Ju njoftojmë se nga fillimi i pandemisë deri më sot, në kuadër të zonës së përgjegjësisë së Stacionit Policor në Podujevë,  janë iniciuar gjithsej 46 raste sipas KPK në bazë të nenit 250 “Mosveprim sipas dispozitave shëndetësore gjatë epidemisë” dhe kanë qenë të arrestuar 90 persona të cilët janë liruar në procedurë të rregullt, pas intervistimit dhe konsultimit me Prokurorin e Shtetit”, thuhet në përgjigjen e PK-së për “Betimi për Drejtësi”.

Ndryshe, në nenin e lartpërmendur thuhet se: “Kushdo që gjatë kohës së epidemisë ose të ndonjë sëmundjeje ngjitëse nuk vepron sipas urdhrave apo vendimeve tjera të nxjerra në bazë të dispozitave të organit kompetent, i cili cakton masat që kanë për qëllim luftimin apo parandalimin e tyre, dënohet me burgim deri në dy (2) vjet”. /BetimipërDrejtësi