21 vite pas luftës, këto janë kërkesat kryesore të qytetarëve të Podujevës
Njëzet e një vjet pas përfundimit të luftës kërkesat e qytetarëve të Podujevës nuk kanë ndryshuar. Ata ende vazhdojnë të kërkojnë asfaltimin e rrugëve në mjediset ku jetojnë, ndërtimin e kanalizimit e ujësjellësit e aty-këtu edhe për ndonjë fushë a sallë sportive.
Megjithëse, takimi i organizuar nga Komuna e Podujevës ishte thirrur nga nënkryetari Nexhmi Rudari për t’i informuar qytetarët me projektet e realizuara në gjysmën e parë të këtij viti, pjesëmarrësit janë interesuar për projektet që ata kanë nevojë.
Naim Hoxha nga fshati Pakashticë e Epërme ka kërkuar që Komuna të përfundojë kanalizimin fekal. Sipas tij, janë 10 familje që kanë mbetur jashtë kanalizimit që e ka ndërtuar Komuna.
“Edhe rruga u asfaltua, po urat nuk janë ndërtuar e duhen 3 ura. Edhe mbrojtëset e rrugës me u ndërtua. Me u ba zgjerimi i një rruge në Pakashticë, Lagjja Kolovicë, edhe zgjerimi i një rruge tjetër.
Me e hjek shtyllën elektrike që e kanë vendos në asfalt”, ka thënë ky pjesëmarrës në këtë takim.
Ndërsa përfaqësuesi i fshatit Llaushë, Rexhep Dauti, ka kërkuar të asfaltohet rruga 1,500 metra e cila, sipas tij, është bërë gati në vitin 2012, por që nuk u asfaltua asnjëherë.
“Ajo e lidh fshatin Dumnicë-Llaushë edhe del në Dobërdol, Bajçinë, e ato fshatrat tjera. I kemi 3 familje në një rrugë 800 m afër kufirit që nuk e kanë me asfalt.
Edhe një tjetër, një familje në një rrugë 500 metra. Po ashtu edhe rruga 600 m që i lidh të dy shkollat”.
