Zyrtarizohet kandidatura e Ekrem Hysenit për Kryetar të Podujevës: “Jam me ju, për ju – do të jem gjithmonë pranë qytetarëve!”

Një zhvillim i rëndësishëm politik ka ndodhur dje në skenën lokale në Podujevë. Ekrem Hyseni i njohur si “Doku”, kryetar i deges i Lidhjes Demokratike të Kosovës (LDK) në Podujevë, ka zyrtarizuar kandidaturën e tij për Kryetar të Komunës së Podujevës, duke u zotuar për një angazhim të ndershëm, profesional dhe në shërbim të qytetarëve llapjanë.

Në fjalimin e tij drejtuar qytetarëve, veprimtarëve dhe anëtarëve të LDK-së, Ekrem Hyseni u shpreh me vendosmëri se kandidimi i tij është përgjigje ndaj nevojës urgjente për ta ndalur keqqeverisjen, nepotizmin dhe për t’ia rikthyer shpresën qytetarëve të Podujevës.

“Jam shumë i vetëdijshëm se Lidhja Demokratike e Kosovës, bashkë me besimin e secilit qytetar, jemi adresa dhe shpresa e vetme për ta ndalur keqqeverisjen dhe për të ndërtuar të ardhmen që meritojmë”, tha Doku.

Ai theksoi se derë e tij do të jetë gjithmonë e hapur për të gjithë, duke përmendur mësuesin, policin, zjarrfikësin, bujkun dhe çdo qytetar që ka nevojë për një qeverisje të drejtë dhe të ndjeshme.

“Fitorja e LDK-së në Llap nuk është vetëm synim, por është mision. E këtë mision vetëm ju, të dashur qytetarë, mund ta bëni realitet”, u shpreh ai.

Në thirrjen e tij për mobilizim qytetar, Hyseni ftoi të gjithë llapjanët që të angazhohen dhe të bisedojnë me familjarët, të afërmit dhe miqtë e tyre për t’iu bashkuar LDK-së dhe kësaj gare për ndryshim.

Ai përfundoi fjalimin e tij me një premtim të qartë:

“Jam me ju, jam për ju – kështu e këtu do të jem përherë!”

Zhvillimet politike në Podujevë po marrin dinamikë të re ndërsa gara për zgjedhjet lokale pritet të jetë e fortë. Portali PodujevaPRESS.net do të vazhdojë të sjellë informacione të përditësuara për çdo hap të kësaj fushate.