Zyrtarin policor e zë sherri me një qytetar, sulmohet fizikisht në një kafene

Nuk janë të rralla rastet kur zyrtarët policorë ballafaqohen me kërcënime serioze nga qytetarët, qoftë gjatë detyrës ose edhe kur janë në rroba civile. E shpeshherë situata eskalon edhe në sulme fizike ndaj tyre, raporton Gazeta Sinjali.

Një rast i tillë ka ndodhur mesnatën e së premtes në një lokal në rrugën ’12 Qershori’ në Ferizaj, ku një person dyshohet se ka sulmuar fizikisht një zyrtar policor që ishte jashtë detyrës.

Burimet e Gazetës Sinjali bëjnë me dije se polici ka pësuar lëndime trupore si pasojë e sulmit dhe është detyruar të kërkojë ndihmë mjekësore në spital.

Ndërkohë është arrestuar personi i dyshuar, i cili është shoqëruar në stacion policor. 46-vjeçari i është nënshtruar edhe testit të alkoolit, ku ka rezultuar në gjendje të dehur dhe ka qenë i pamundur intervistimi i tij nga organet e hetuesisë.

Me urdhër të prokurorit, i dyshuari është dërguar në mbajtje nën dyshimet për kryerjen e veprës penale ‘Sulm ndaj personit zyrtar’.