Zjarrfikësit në Podujevë, në luftë të përditshme me flakët – pak staf, shumë rrezik

Armiku i tyre është zjarri dhe përballja me të është luftë e përditshme, ku jeta është gjithmonë në rrezik. Zjarrfikësit e Podujevës, si në shumë qytete të tjera të Kosovës, po përballen me sfida të mëdha, sidomos gjatë ditëve të nxehta të verës dhe pas korrje-shirjeve, kur rreziku për zjarre është i lartë.

Në këtë periudhë të ndjeshme, zjarret në amullore, livadhe dhe pranë zonave të banuara janë bërë një problem serioz. Institucionet lokale dhe ato qendrore kanë lëshuar thirrje të qarta për qytetarët që të shmangin ndezjen e zjarreve në hapësira të hapura, pasi pasojat mund të jenë katastrofike.

Njësia e zjarrfikësve në Podujevë ka pasur një numër të madh intervenimesh vetëm gjatë ditëve të fundit. Në shumë raste, zjarret kanë rrezikuar edhe shtëpitë dhe pronat private, duke vënë në pikëpyetje sigurinë e qytetarëve dhe vetë zjarrfikësve.

“Jemi pak në numër dhe pa pajisjet e nevojshme, por përballen me zjarrin çdo ditë, sepse dikush duhet ta bëjë këtë punë,” shprehen disa nga zjarrfikësit. Ata apelojnë fuqishëm te qytetarët që të ndalojnë praktikat e rrezikshme si ndezja e zjarreve në fushë apo në amullore, të cilat shpeshherë dalin jashtë kontrollit.

Pavarësisht sfidave, mungesës së stafit dhe pajisjeve moderne, zjarrfikësit e Podujevës vazhdojnë të jenë në krye të detyrës këta janë heronj të heshtur, që rrallëherë përmenden, por gjithmonë janë të parët që vrapojnë drejt rrezikut.

Pamje nga intervenimet në Podujevë: