Zhvillimet e fundit në LDK, reagon Agim Veliu

Agim Veliu ka reaguar publikisht pas debatit të ditëve të fundit brenda Lidhjes Demokratike të Kosovës, lidhur me përfaqësimin në listën zgjedhore të 28 dhjetorit. Përmes një postimi të gjatë, ai u është drejtuar anëtarëve, simpatizantëve dhe strukturave të LDK-së, duke falënderuar të gjithë ata që, siç thotë ai, kanë ngritur zërin për kontributin e tij dhe për rikthimin e meritokracisë në parti.

Veliu thekson se diskutimet e fundit për listën kanë nxitur reagime të shumta, por ai nënvizon se përfshirja në listë “nuk është favor apo privilegj personal”, por një përgjegjësi për këdo që ka dhënë kontribut të gjatë në LDK.

“Edhe në zgjedhjet e kaluara ka ekzistuar pritja të jem pjesë e listës, por pavarësisht vendimeve të padrejta të asaj kohe, unë kam vazhduar të qëndroj aty ku kam qenë gjithmonë – në shërbim të LDK-së dhe qytetarëve”, shkruan ai.

Më tej, Veliu shton se LDK është “shtëpia e përbashkët”, e ndërtuar me mund e sakrificë nga njerëz që, sipas tij, ishin aty në kohët më të vështira. Ai thekson se është e pakuptimtë që “të hapet dera për njerëz që s’kanë qenë pjesë e LDK-së, nëse kjo nënkupton lënien jashtë të atyre që e kanë themeluar dhe mbajtur gjallë partinë për mbi 30 vite”.

Veliu deklaron se respekti për bazën dhe themeluesit është detyrim moral dhe institucional, duke shprehur se mbetet i përkushtuar ndaj vlerave të LDK-së dhe i gatshëm të vazhdojë kontributin e tij.

Në fund, ai falënderon mbështetësit për vlerësimin dhe besimin, duke përmbyllur mesazhin me thirrjen:

“Zoti e bekoftë LDK-në! Zoti e bekoftë Rugovën! Zoti e bekoftë Kosovën!”