Zhbllokohet Kuvendi i Podujevës, por mungon opozita

Pushteti në Podujevës ka arritur të mbajë mbledhjen e Kuvendit Komunal pas dy dështimeve javën e kaluar dhe dy të tjerave gjatë ditës së hënë. LDK-ja dhe partitë në pushtet nuk kanë arritur t’i tejkalojnë të gjitha dallimet, pasi këshilltarët opozitarë kanë kërkuar që përveç kërkimfaljes dhe dhënies së mëditjeve që u janë ndalur në muajin shtator, seanca të nisë nga pika e parë. Por, kërkesa e tretë nuk është përmbushur, çka ka bërë që ata ta lëshojnë sallën

Pushteti dhe opozita në Podujevë nuk i kanë tejkaluar ende dallimet për të mbajtur seancën e rregullt të Kuvendit Komunal.

Këshilltarët e LDK-së në opozitë kanë insistuar në një marrëveshje të javës së kaluar që, sipas tyre, kryesuesi duhet t’u kërkojë falje, t’ua jap mëditjet e muajit të kaluar dhe seanca të nisë nga pika e parë.

E kryesuesi i Kuvendit Komunal është pajtuar për kërkimfalje dhe t’u jepen mëditjet, por jo edhe që seanca të nisë nga pika e parë.

“Po vazhdojmë me mbledhjen e datës 31 tetor 2022. Së pari konstatojmë kuorumin për momentin 26 janë prezentë, 9 mungojnë. Mbledhja e kaluar dihet që është ndërprerë, është ndërprerë në pikën e gjashtë. Pika e pestë është votuar. Ne vazhdojmë me pikën e gjashtë. Shiko, aty vazhdojmë ku kemi mbet. Kuorum ka pas, pikat janë votuar, janë kaluar”, ka thënë kryesuesi Hilmi Hoxha, derisa po u përgjigjej pyetjeve të këshilltarëve të LDK-së. “Unë jam konsultuar me Zyrën ligjore. Marrëveshje nuk mund të bëjë kurrkush, të kthehen pikat që janë votuar. Nuk mund t’i anulojmë, se s’kam të drejtë”.

Por, opozita nuk është pajtuar që të procedohen pikat aty ku kanë mbetur.

Adnan Zymeri, këshilltar komunal nga radhët e LDK-së, ka thënë se mënyra se si po tentohet të vazhdohet seanca është e papranueshme.

“Ti e di shumë mirë, prej një situate të pakëndshme për të gjithë ne që u krijua në seancat e kaluara, na jemi dakorduar si grupe politike në praninë e shefit të grupit parlamentar të Vetëvendosjes, në praninë e Bashkim Sylës së PDK-së dhe përfaqësuesit e LDK-së, për një marrëveshje të cilën ti e di shumë mirë. Tashti kësaj marrëveshjeje nuk je duke iu përmbajtur dhe qysh janë zhvilluar punimet e seancës së fundit, ka qenë e tmerrshme dhe nuk e konsideroj që është në rregull që të vazhdohet prej pikës së pestë dhe gjashtë”, është shprehur këshilltari Zymeri.

Kryesuesi Hoxha, ka thënë se çështjen e kërkimfaljes e ka lënë në të ndryshme, pasi nuk ka dashur që këtë çështje ta hap në fillim.

“Marrëveshja është që mëditjet t’u paguhen edhe kam thënë që në atë marrëveshje në qoftë se kam bërë shkelje ligjore ju kërkoj falje Grupit që i është bërë ndalesa e mëditjeve. Kështu është marrëveshja. Marrëveshje që unë e kthej prej pikës së parë rendin e ditës, nuk kam. Qe ku është Hakiu dëshmitar edhe Bashkimi që kjo marrëveshje ka qenë që mëditjet me i marrë me këtë muaj. Po s’desha as me çelë në opinion me dalë me u përsërit se po më duket u bë pak tepër”, ka theksuar kryesuesi Hoxha.

Ai u ka thënë këshilltarëve të LDK-së se bashkë me mëditjet që do t’i marrin me pagën e këtij muaj, do t’i marrin edhe për muajin shtator.

LDK-ja ka insistuar që përveç kërkimfaljes e zotimit për dhënien e mëditjeve, seanca të nisë nga pika e parë

“Ti si tërthorazi e kalove këtë pjesën e marrëveshjes… Ti që po e potencon dhe po të vjen shumë vështirë me kërkua falje dhe po thua ‘nëse ka shkelje’. Po ti për vet faktin që po vendos me procesu me pagat në fund të muajit i bie që shkelja ka ndodhë”, ka thënë Arjant Topanica, asamblist i LDK-së. “Është e natyrshme, njerëzore dhe korrekte që me vazhdu prej pikës së parë se atë ditë të gjithë e dimë, janë edhe incizimet, që nuk ka pasur kushte për me u procedu pikat që po i supozoni si të kalueshme”.

Por, Hilmi Hoxha, ka thënë se nuk e shkel Rregulloren që seanca të nisë nga e para.

Pasi ka nisur ta lexojë pikën e gjashtë, asamblistët e LDK-së e kanë lëshuar sallën e Kuvendit Komunal, duke e pamundësuar vazhdimin e seancës për shkak të mungesës së kuorumit. Kryesuesi e ka shtyrë seancën dy herë gjatë ditës dhe vetëm në përpjekjen e tretë është arritur që të bëhet kuorumi për të vazhduar mbledhja.

Kjo seancë ishte paraparë për 31 tetor, por mbajtja e saj është pamundësuar dy herë gjatë javës së kaluar. Shkak është bërë ndalja e mëditjeve të mbledhjes së muajit shtator. Këshilltarët e LDK-së në shenjë proteste kishin dalë në foltore duke krijuar edhe zhurmë për ta pamundësuar mbajtjen e kësaj mbledhje. Ndërsa, pushteti pas disa përpjekjeve ka arritur që të vazhdojë të hënën këtë seancë pa opozitën.