Zbulohet çka i kërkoi Boltoni Ramush Haradinajt!

Nënkryetari i Aleancës për Ardhmërinë e Kosovës, Ardian Gjini, ka folur për bisedën telefonike që kishte kryeministri Ramush Haradinaj me këshilltarin amerikan për siguri kombëtare, John Bolton, të mërkurën.

Ai tha se nuk ishte fizikisht aty mirëpo, sipas tij, në këtë bisedë kryeministrit Haradinaj i është përmendur pezullimi i taksës.

“Me sa di unë është përmendur që kish qenë mirë të pezullohet taksa dhe cila ka qenë pjesa tjetër e bisedës nuk e di. Sa e di, biseda ka qenë shumë korrekte, SHBA-të na kanë trajtuar jashtë proporcionalisht mirë në krahasim me madhësinë e shtetit tonë”, ka thënë Gjini në “Rubikon” të KTV’së.

“Kjo temë do të diskutohet por mendoj që gjithë bota duhet ta kuptojë që Kosova duhet me marrë çka meriton. Edhe një herë po ju them që është bërë një kohë e gjatë që këtu ka pasiguri, gjithçka ndodh brenda vitit dhe nuk po mundemi të stabilizohemi sepse po dalin gjëra tjera”.

Ndërkohë, Gazeta Metro mëson se thirrja telefonike e shumëpritur nga Shtëpia e Bardhë ka shkuar keq dhe me tone të rënda.

Kjo ka shqetësuar parnerët e koalicionit qeveritarë, të cilët i kanë dhënë vetes dy ditë kohë për të gjetur një zgjidhje të përbashkët, për kalimin e kësaj situate.

‘Liderët do të takohen edhe nesër dhe taksa të pritet të pezullohet, më së largu javën e ardhshme’, bëjnë të ditur burime të Gazetës Metro brenda koalicionit qeveritar.