Zbulohen 1 milion euro në Merdare, të fshehura brenda rezervuarit të automjetit | Foto

Një aksion i jashtëzakonshëm i Doganës së Kosovës në pikën kufitare në Merdarë ka parandaluar një tentativë masive të kontrabandimit të parave të gatshme, ku janë zbuluar rreth 1 milion euro të padeklaruara. 

Burimet kanë treguar se shuma marramendëse e parave ishte e kamufluar me kujdes brenda rezervuarit të karburantit të një veture, e paketuar në mënyrë të organizuar me qëllim që t’u shpëtonte kontrolleve të rregullta doganore.

Ky zbulim spektakolar është bërë i mundur falë përdorimit të pajisjeve të avancuara të skanimit, të cilat kanë sinjalizuar ndërhyrje të dyshimta në strukturën e automjetit. Pas sinjalit nga skaneri, zyrtarët doganorë kanë nisur një kontroll të detajuar fizik, i cili çoi në hapjen e rezervuarit ku edhe u gjetën pakot me para. 

Dyshohet se kjo shumë e konsiderueshme po tentohej të futej ilegalisht në territorin e Kosovës, ndërsa mjeti dhe paratë janë konfiskuar menjëherë për procedura të mëtutjeshme hetimore. 

Personat e përfshirë në këtë rast janë shoqëruar në polici, ndërkohë që po hetohet prejardhja e parave dhe destinacioni i tyre final.