“Zahir Pajaziti” mbyllet për shumë lojtarë të Llapit

Stadiumi “Zahir Pajaziti” në Podujevë për shumë futbollistë do të jetë i mbyllur të paktën deri më 15 maj.

I hapur do të jetë vetëm për futbollistët që janë të qytetit të Podujevës, por jo edhe për futbollistët që janë nga qytetet tjera.

Trajneri i Llapit, Tahir Batatina, ka thënë se i ka ndërprerë stërvitjet në grupe deri në një vendim tjetër. Ditë më parë Batatina ka treguar vet se në njërën prej seancave stërvitore janë vizituar nga zyrtarët e Policisë së Kosovës. Por, ai ka mohuar të jetë kjo arsyeja e ndërprerjes së stërvitjeve në grupe.

“I kam ndërprerë, kam bërë program dhe po punojnë nga tre lojtarë. Janë duke bërë vetëm vrapime derisa të merret një vendim. Disa futbollistë po vazhdojnë stërvitjet në stadium, disa në natyrë. Ardhja e zyrtarëve të policisë nuk ka ndikuar. Pasi nuk po dihet se a do të fillojë kampionati apo do të ndërpritet, kemi vendosur ta vazhdojmë punën në grupe jo në stadium”, ka thënë Batatina të hënën për Koha.net. Batatina shpreson në përgjigje sa më të shpejtë nga institucionet shëndetësore dhe Federata e Futbollit e Kosovës, nëse do të ketë apo jo vazhdim të kampionatit.

“Ka shumë paqartësi, sepse edhe vet Federata nuk është konkrete dhe nuk po e merr përsipër situatën”, ka thënë Batatina.