Z. Veseli, më dëgjo edhe mua

I nderuar z.Veseli,

Në një turne nëpër Kosovë, në këto javët e fundit, ke dëgjuar shumë.

Duhet të këtë qënë një përvojë interesante kjo. Po shpresoj që nuk i ke humbur, në ndërkohë, shënimet që i merrje me laps dore. Ose, nëse ia ke prezentuar partnerit, Isa Mustafës, sigurisht që ato i ka hedhur në shportën që qëndron pas derës. Ai e ka një tjetër rrëfim për vendin.

Sido që të jëtë, meqë jemi në fushatë dëgjimesh, më lejo t’i thëm edhe unë disa opinione të miat, për ty dhe për gjendjen.

Z. Veseli,

Koalicioni qeverisës në të cilën ndodhet PDK nuk është vepër e juaj. Atë marrëveshje e trasheguat nga paraardhësi i juaj, z. Thaci, i cili e shfrytëzoi për mrekulli, për interesa personale, duke u bërë President i Kosovës.

Korrekt dhe e pritshme prej anës së tij.
Ai, besoj unë, e ka ndërgjegjën e pastër për këtë gjë. Politika, për të, nuk është arenë në të cilën gjaku shkon vadë për moral. Në këtë mënyrë, edhe Thaci, duke i futur në dispozicion sehiret e tij, ku me një terminal doganor, e ku me një post të ambasadorit, e kaloi lumin pa u lagur.
Ty t’i la, sic thotë populli, këmbët e arushës në dorë. Përfundove, si Kryetar i partisë më të madhe në vend, në pozitën e tretë më të rëndësishme në vend, duke hartuar ligje nëpër gaz lot.

Derisa Presidenti Thaci dhe Kryeministri Mustafa, përvec tjerash, argëtoheshin edhe më cështje madhore, sic është dialogu, takimet e rëndësisë botërore në Bruksel, ju e kaluat kohën duke fikur boca të gazit lotsjellës në sallën e Kuvendit.

Koalicioni i madh qeverisës ishte i madh vetëm për punën e qeverisë, por jo edhe për punën e Kuvendit të Kosovës. Ju këtë e keni parë më së miri. Ndonëse i kishit në dispozicion rreth 90 deputetë, në letër, kur ishte puna për të marrë vendime të rëndësishme, ku kërkohej vota e tyre, nuk arritët t’i bënit dot 80 frymë në një mendje dhe në një votë.

Kurse partneri i juaj, z. Mustafa, por edhe ish paraardhësi i juaj, Thaci, Kuvendin e Kosovës vazhdojnë ta shohin si vrimën e zezë të rrëfimit të bukur për Kosovën. Sipas tyre cdo gjë po shkon vaj, po të mos ishte Kuvendi i Kosovës, në të cilin dështon cdo gjë. Pra, në institucionin në të cilin ju e drejtoni. Partneri i juaj, z. Mustafa, në anën tjetër, secilën herë e më shumë po e nënvizon faktin që qeveria e drejtuar nga ai dhe LDK, po bën punë enorme në frontin e zhvillimit ekonomik. Madje, sipas tij, këto suksese po i pengojnë disa. Ishalla nuk po mendon për ty personalisht.

Posacërisht, sipas Mustafës, është e rëndësishme puna në Ministrinë e Financave, atë të Tregtisë dhe Industrisë, e edhe në ndonjë ministri tjetër.
Dhe i gjithë ky rrëfim i suksesit të llahtarshëm, përpara të cilit xhelozët asfiksohen, përmblidhet në dy tri grafikone. I pari, që Kosova paska shënuar një rritje ekonomike prej rreth 4 për qind, në vitin e fundit; dhe i dyti që investimet e huaja direkte në vitin e fundit, paskan qënë më të lartat në tri vitet e fundit. Prej 100 milionë euro investime, kemi shkuar në 200 milionë euro. Ose dicka e ngjashme. Krahasime komike, që i bindin vetëm fëmijët nën moshën 10 vjecarë.

Ku jeni ju në këtë mes, z. Veseli, si kryetar i partisë më të madhe në vend? Ose ku e shihni vetën në këtë mes? A besoni që Kosova po prosperon me hapa galopantë? A besoni që papunësia është në grahmat e saja të fundit? Nëse kjo qeveri vazhdon me këto ritme, ka rrezik që do të shkojmë në shtetet fqinje për të kërkuar punëtorë. A jeni i bindur që partneri i juaj, Isa Mustafa, e tha fjalën e tij profesionale gjatë kësaj kohe, por ishte Kuvendi ai që nuk e bëri një gjë të tillë?

Sigurisht që i gjithë ky është një cirkus i madh. Kosova, për faje të shumë qeverive, e edhe të kësaj, është një qendër masive e analfabetizmit. Ne jemi rreshtuar në mënyrë të sigurt s’i vendi me nxënësit më të dobtë në Evropë, e ndoshta edhe në botë. Sistemi shëndetësor është në prag të shthurjes totale. Meqë besimi ka humbur krejtësisht, meqë tregtarët e kanë marrë në dorë mjekësinë, shqiptarët e ngratë po shkojnë për shërim në Beograd dhe në Shkup. Në Prishtinë stacionohen vetëm ata që bash hic askund nuk mund t’ia mësyejnë. Për shkak të arritjeve të mëdha, rinia e Kosovës, për fatin tonë të keq, ka rënë pre e rrymave radikale dhe esktremiste. Qytetarët e kanë humbur besimin në cdo gjë që e mban vulën e Republikës së Kosovës. Në fakt, besimin në shtetin tonë edhe më tutje nuk e ka humbur vetëm Blerim Devolli, i cili po pret me padurim që dhjetëra milionave të tij, t’ia shtojë edhe nja 30 të tjera.

Gjakderdhja po vazhdon në të gjitha nivelet shoqërore. Vetëm shikojini sondazhet, të cilat flasin për besimin e qytetarëve në institucionet e Kosovës. Është e tmerrshme. Ndoshta vetëm strukturat paralele serbe, në veri të Kosovës, gëzojnë më pak përkrahje.

Z. Veseli,

Sic e thashë edhe në fillim të këtij shkrimi, ju nuk jeni autori i marrëveshjes me LDK’në, por edhe ju jeni përgjegjës për këtë qeveri. Për dështimet e saj. Për kolapsin e Republikës së Kosovës. Për izolimin e qytetarëve të saj.

Për këtë arsye, shërbimi më i madh që do t’ia bënit vendit për momentin do të ishte cmontimi i kësaj krijese, më sa më pak dëme anësore. Sfidojeni partnerin, pra Isa Mustafën, edhe me demarkacionin. Tregoji që votat në Këshillin e Përgjithshëm të LDK’së, për këtë temë, janë të rëndësishme, por nuk kanë vlerë juridike. Grupi i tij parlamentar për demarkacionin duhet të votojë në Kuvend të Kosovës, sic duhet të bëjë edhe grupi i PDK’së. Le ta shohim të gjithë, faqe botës, se ky koalicion është një farsë e madhe. Se krejt cfarë thuhet për të është një mashtrim.

Për të mirën e të gjithëve, hiqja njërën këmbë karrigës. Ne nuk e dimë se cfarë do të ndodhë pas zgjedhjeve, por e dimë saktësisht se cfarë do të ndodhë nëse nuk mbahen zgjedhjet. Do të vazhdojmë të zhytemi në mosbesim dhe në apati, deri në një shpërthim të pakontrolluar shoqëror.

Tashmë diga është mbushur deri në maje.