Yee s’vjen në Kosovë?

Vizita e Hoyt Yee në Prishtinë ende nuk është konfirmuar, për shkak të situatës konfuze që mbretëron në skenën politike të vendit.

Megjithëse javën e shkuar në mediat vendore u paralajmërua vizita e re në Prishtinë e Hoyt Yee, Zëvendës-Asistentit Amerikan të Shtetit, ka të ngjarë që Yee, i cili këto ditë qëndroi në Shkup, mos të vijë fare në Kosovë.

Kështu së paku kanë deklaruar burime diplomatike perëndimore për Politiko.net

Yee ka mbërritur në Shkup me urgjencë, për shkak të zhvillimeve të njohura që kërcënojnë me themel stabilitetin e Maqedonisë, por edhe të gjithë rajonin.

Dihet që Washingtoni zyrtar ka mbështetur fuqimisht zgjedhjen e Talat Xhaferit në postin e Kryetarit të Kuvendit të Maqedonisë, gjë që me gjasë ka pasur rëndësi vendimtare që ngjarjet e 27 prillit, të mos përsëriten të nesërmen në kryeqytetin e Maqedonisë.

Vizita e Yee në Prishtinë, sipas burimeve diplomatike perëndimore, nuk është konfirmuar për shkak të situatës konfuze që mbretëron në skenën politike të vendit, rreth krye-temës së qëndrimit eventual të diplomatit amerikan në Kosovë: Asaj të Ratifikimit të Marrëveshjes për shënjimin e kufirit në mes të Kosovës dhe Malit të Zi.

Yee ka biseduar para dhjetë ditësh, më 21 prill, në telefon me Kryeministrin Mustafa dhe Kryeparlamentarin Veseli për këtë çështje. Veseli në komunikatën e tij për media pati thënë që është çështje ditësh kur Ligji për Demarkacionin do të procedohet në Kuvendin e Kosovës, por ky afat kohor u vë në dyshim nga vetë Kryeministri Mustafa, i cili përmendi mundësinë që “së shpejti” ky Ligj të shkojë në Kuvendin e Kosovës.

Në ndërkohë, u bë e njohur nisma e 15 deputetëve të LDK’së e cila flet për një Nen të ri që do të duhej të përfshihej në Ligjin për Ratifikimin e Marrëveshjes me Malin e Zi, i cili do ta linte të hapur mundësinë e rishikimit të saj, pas dy vjetësh, në dy pikat më kontestuese, në Kullën e Zhlepit dhe në Çakorr. Po që se ky Nen do të përfshihej në Ligjin aktual, ka të ngjarë që deputetët e LDK’së ta votojnë Marrëveshjen aktuale.

Megjithatë, sipas burimeve diplomatike perëndimore, kjo nismë nuk është mirëpritur tek ambasadat kryesore perëndimore në Prishtinë dhe as prej Zyrës së BE’së, megjithëse aktualisht nuk ka deklarata publike për këtë iniciativë.

Çfarëdo formulimi i ri në Ligjin në fjalë, në radhë të parë duhet të dakordohet me Podgoricën zyrtare – Qeverinë e Malit të Zi, dhe vetëm pastaj do të mund të procedohej tutje në Kuvendin e Kosovës. Kështu ka qenë rasti edhe me Nenin që është përfshirë në Draft-Ligjin që ishte proceduar në Kuvendin e Kosovës, në fundin e gushtit të vitit të kaluar. Me këtë Nen (që ishte koordinuar me Qeverinë e Malit të Zi të cilën asokohe e udhëhiqte Milo Djukanovic) ishte lënë mundësia ligjore për ri-shikimin e Marrëveshjes, nëse palët nënshkruese në ndërkohë do të sillnin fakte të reja të cilat nuk kanë qenë të ditura në kohën e arritjes së saj.

Sidoqoftë, e gjithë kjo rrëmujë që po mbretëron në politikën kosovare në temën e Demarkacionit, e cila mund ta çojë vendin në zgjedhje të reja të jashtëzakonshme, nuk pritet të qartësohet së shpejti, apo duket që do të ketë vazhdimësi të këtij konfuzioni edhe për disa ditë të tjera. / Politiko.net