VV’ja ia merr edhe një deputet LDK’së

Kur numërimi i votave me kusht po shkon drejt fundit, VV’ja duket se ka një deputet më shumë, e rrjedhimisht koalicioni LAA mbetet pa një të tillë.

Kështu bëjnë të ditur burime të Metro brenda KQZ’së, por të cilën gjë e konfirmojnë edhe kandidatë të zgjedhur të VV’së.

Ka qenë kryetari i Prishtinës, Shpend Ahmeti, i cili ka shkruar për arritjen e një deputeti më shumë.

‘Pas numërimit të votave me kusht, Vetëvendosje arritu në 32 deputetë. Falemnderit!’, ka shkruar Ahmeti.

Marrjen edhe një deputeti tjetër, e ka konfirmuar për Metro edhe kandidati që ka siguruar votat për Kuvend, Fisnik Ismaili. Ai ka thënë se ka të dhëna që tregojnë se kanë marrë edhe një deputet.

‘Po me votat e diasporës iu ofruam edhe një deputeti më shumë por nuk e arritëm. Tash duket se me kusht e kemi marrë edhe një deputet’, ka thënë Ismaili për Metron.

Mirëpo, siç thotë për Metron zëdhënësi i KQZ’së’, Valmir Elezi, rezultatet përfundimtare do të dalin sot ose nesër. Ai ka treguar që kanë mbetur edhe 2 mijë vota me kusht për t’u numëruar.

‘Sot do të përmbyllet numërimi i votave me kusht. Deri mbrëmjen e djeshme janë numëruar rreth 23 mijë vota me kusht. Kanë mbetur edhe 2 mijë të tjera, të cilat do të numërohen sot’, ka thënë Elezi për Metron.

Ndryshe, me këto ndryshime, VV’ja arrin në numrin e 32 deputetëve, ndërkaq LAA bie në 29 deputetë. Sipas të dhënave, PAN’i mbetet me numër të njëjtë të deputetëve , 39 sosh./gazetametro/