VV zbutet, nuk ka plan kundërshtimi për nesër në Kuvend

Përveç votës kundër, Lëvizja Vetëvendosje nuk ka ndonjë plan konkret të  kundërshtimit për marrëveshjen e demarkacionit me Malin e Zi, që pritet të votohet nesër në Kuvend

Për herë të parë kjo parti pranon se nuk ka plan për ndonjë aksion të mundshëm ashtu siç kishin bërë në kohën kur demarkacioni ishte top temë.
E as ndonjë aksion të ngjashëm si ai kur deputetët e VV-së bllokuan fjalimin e ministres Dhurata Hoxha në interpelancën për Astrit Deharin, duke goditur tavolinat e duke bërë zhurmë.
Deputeti i kësaj partie Sami Kurteshi i ka thënë gazetës Blic, se i vetmi kundërshtim i tyre, nëse marrëveshja do hidhet në votim, është vota kundër.

“Ne do votojmë kundër, dhe do e arsyetojmë votën tonë kundër kësaj marrëveshje” ka thënë Kurteshi për Gazetën Blic.

Ai ka bërë më dije se do jenë të zëshëm në sqarimin e arsyeve se pse kjo marrëveshje nuk duhet të kalojë, por se nuk kanë plane tjera.

“Ne, ashtu siç edhe e dini mendojmë se kjo marrëveshje nuk e ka fare vendin në Kuvend, por nëse do vihet në votim, ashtu siç edhe e thash do e votojmë kundër dhe do tregojmë pse” ka thënë Kurteshi.

Por kaq i qartë në përgjigje nuk ka qenë edhe deputeti tjetër i kësaj partie Rexhep Selimi.
Ai nuk ka dashur të flasë se çka do bëjnë nesër deputetët  e VV-së në seancë, por ka thënë se nuk dëshiron që ta ndajë këtë informacion
“Nuk kam çka të ndajë me ju, në këtë pikë, për këtë çështje” ka thënë Selimi.
Seanca për demarkacionin me Malin e Zi është thirr për ditën e martë,(nesër) me fillim nga ora 16:00, ndërsa që nuk ka siguri ende për votat.
Ndonëse nga Qeveria e Kosovës janë deklaruar se janë siguruar 80 vota./GazetaBlic/