VV në Podujevë: Studentët me fakultet nuk po gjejnë punë, po punësohen familjarë të zyrtarëve

Lëvizja Vetëvendosje në Podujevë nëpërmjet një aksioni para objektit të komunës ka shpalosur disa “punësime familjare” të zyrtarëve të lartë komunalë.

Këshilltari i kësaj partie, Avni Fetahu, ka thënë se kjo komunë ka bërë edhe shkelje ligjore në disa kontrata, siç janë paraqitur edhe në raportin e Auditorit, e për të cilin ka thënë se pushteti në Podujevë nuk po e sjell në Kuvend.

“Nuk është sjellë nga një nënkryetar kukull i cili dirigjohet nga Agim Veliu, dhe i cili nuk e ka legjitimitetin e votës së popullit. Përndryshe është shqetësuese se si shihet në gjetjet e Auditorit, nënshkruhen 30 kontrata pune duke e shkelur ligjin dhe duke i tejkaluar edhe afatet ligjore rreth kontratave që janë mbi vepër. Në të njëjtën kohë, nga 179 kontrata të lidhura prej Komunës së Podujevës, vetëm 5 prej tyre janë që e kanë paramasën dhe parallogarinë. Kjo do të thotë se kur nuk ekziston paramasa dhe parallogaria ekziston mundësia e keqpërdorimit të parasë publike e cila iu ka dhënë këtyre në mirëbesim”, ka theksuar Fetahu gjatë këtij aksioni.

Sipas tij, një element tjetër shqetësues është edhe eliminimi i operatorëve ekonomikë që kanë ofertën më të lirë.

“Vetëm në një rast të tillë që e ka gjetur Auditori i jashtëm, komuna e Podujevës është dëmtuar me 75 mijë e 670 euro në projektin e ndërtimit të trotuareve në disa fshatra. Me këtë shumë do të mund të ndërtoheshin së paku 5 shtëpi. Në të njëjtën kohë Instituti RIINVEST ka bërë indeksin e konkurrueshmërisë së komunave për vitin 2020 dhe paramendoni komuna e Podujevës as që ekziston fare në mesin e komunave që kanë performancë të mirë. Komuna jonë gjendet në vendin e 33 në listë, ku mbrapa lë vetëm komunat si Leposaviqi e Zubin Potoku”, është shprehur këshilltari i VV-së.

Ndërsa, tjetër shqetësim Fetahu paraqiti papunësinë.

“Një shqetësim tjetër i cili po e preokupon qytetin është edhe punësimi. Paramendoni sa studentin e kemi me fakultet dhe master edhe ata nuk po mund të gjejnë vend pune, sepse këta të dy që po i shihni (Agim Veliu dhe Nexhmi Rudari) e kanë humb kontaktin me qytetarin për jetën reale dhe janë duke e shfrytëzuar vetëm përmes Facebook-ut dhe selfive dhe duke punësuar të afërm dhe familjarë të tyre. Hiç më larg se 50 metra nga këtu është shkolla ‘Shaban Shala’ ku është i vendosur u.d. i drejtorit vëllai i nënkryetarit aktual, i cili pretendon të bëhet edhe drejtori i kësaj shkolle”, ka thënë ai.