VV në Podujevë akuzon Agim Veliun

Lëvizja Vetëvendosje në Podujevë në një komunikat për medie ka akuzuar Komunën e Podujevës, konkretisht kryetarin e Komunës Agim Veliu për Ditën e Çlirimit, transmeton PodujevaPRESS.com.

Kjo parti politike e ka akuzuar Kryetarin e Komunës se me veprimet apo mos veprimet për mos shënimin e kësaj date, paraqet përpjekje të vazhdueshme për të shlyer kujtesën historike të popullit, por gabohen rëndë, sepse populli ruan me fanatizmin më të madh kujtesën për datat, ngjarjet dhe epopetë e veta dhe sidomos gjakun dhe sakrificat për t’a fituar lirinë.

Kjo është komunikata e plotë:

Komunikatë

Të dashur qytetarë e qytetare të Llapit,
Nesër më 19.06.2017 është datë e shënuar në historinë e re të Llapit, sepse është Dita e Çlirimit të Besianës nga okupatori fashist serbo-sllav.Çlirimi u arrit nga kontinuiteti i lëvizjes sonë kombëtare, me sakrifica të mëdha brez pas brezi, por që kulmoi me Epopenë e Lavdishme të Ushtrisë Çlirimtare të Kosovës.
Fitorja e lirisë së shenjtë për njeriun dhe njerëzimin është vlera që nuk ka çmim, dhe dita e çlirimit duhet të shënohet domosdoshmërisht si moment i lumturisë, gëzimit, krenarisë, por edhe përkujtimin e sakrificave sublime për fitoren e saj.Në këtë ditë do të duhej, që Administrata Komunale e Besianës, gjegjësisht Kryetari të organizojë shënimin e kësaj date kaq të rëndësishme për Llapin dhe qytetarët e tij, por nuk është bërë asgjë, përveç flamijve të vënë në ndërtesën e komunës dhe disa shtylla për rreth komunës.Veprimet apo mos veprimet për mos shënimin e kësaj date, paraqet përpjekje të vazhdueshme për të shlyer kujtesën historike të popullit, por gabohen rëndë, sepse populli ruan me fanatizmin më të madh kujtesën për datat, ngjarjet dhe epopetë e veta dhe sidomos gjakun dhe sakrificat për t’a fituar lirinë.Në emër të Qendrës së Lëvizjes VETËVENDOSJE! në Besianë shfrytëzoj rastin,që t’ iu uroj me zemër Ditën e Çlirimit të Besianës.Me respekt,
Kryetari i Qendres, Bajram Ajeti