VV: LDK në Podujevë po i detyron nxënësit e shkollave fillore të marrin pjesë në tubimet e tyre elektorale

Lëvizja Vetëvendosje thotë se LDK ka obliguar edhe nxënësit e shkollës fillore të marrin pjesë në hapjen e fushatës së saj dje në Besianë.

Përmes një njoftimi në Facebook, dega e VV-së në Besianë thotë se përvec se nxënësit janë detyruar të shkojnë, ata janë detyruar edhe t’i bartin karriget për në vendin e tubimit.

Krejt këtë sipas VV-së, LDK po e bën  nga paniku i thellë e rritjes së pandalshme të Lëvizjes edhe në vendin që ata e kanë konsideruar si bastion të tyre.

Ja njoftim i tyre:

Të gjendur në panik të thellë, nga rritja e pandalshme e Lëvizjes, në atë që dikur konsiderohej bastion i tyre, Lidhja Demokratike e Kosovës dhe dega e saj në Besianë, po përdorin çdo mjet të mundshëm, për të krijuar përshtypjen se Llapi është ende pronë e tyre.

Qysh në ditën e parë të fushatës, LDK-ja e Besianës ka vazhduar abuzimin me nxënësit dhe shkollat publike. Për shkak të hapjes së fushatës së LDK-së në Besianë në palestrën e sporteve “Hakif Zejnullahu”, nxënësit e shkollës fillore “Enver Maloku”, e humbën mësimin dje dhe sot. Përpos që u obliguan të marrin pjesë në një tubim partiak, për më keq klasët e shkollës mbetën bosh, pasi që nxënësit u detyruan që karriget e tyre t’i dërgojnë në palestër, për t’i mundësuar LDK-së mbajtjen e tubimit dhe mbushjen e sallës.

Lëvizja VETËVENDOSJE!, kërkon që të ndalet abuzimi më nxënësit dhe institucionet publike. Gjithashtu kërkojmë nga organet kompetente, që të hetojnë këto raste dhe të marrin masa konkrete ndaj shkeljeve dhe abuzimeve të degës së LDK-së në Besianë.